गुजरात: गुजरातच्या किनारपट्टीवर सुरक्षा यंत्रणांनी एका थरारक मोहिमेत ड्रग्ज तस्करीचा मोठा कट उधळून लावला आहे. कच्छ समुद्रात भारतीय तटरक्षक दल आणि गुजरात एटीएसने संयुक्तरीत्या राबवलेल्या कारवाईत तब्बल 1180 कोटी रुपयांचे 118 किलो कोकेन जप्त करण्यात आले आहे. या आंतरराष्ट्रीय ड्रग्ज रॅकेटचे धागेदोरे दिल्लीपर्यंत पोहोचत असल्याचे प्राथमिक तपासात निष्पन्न झाले आहे.
ही कारवाई मंगळवारी सकाळी मुंद्रा बंदराजवळ सुमारे 9.5 किलोमीटर अंतरावर करण्यात आली. सुरक्षा दलांनी समुद्रात एका संशयास्पद जहाजाचा अनेक तास पाठलाग केला. तस्करांनी जहाजावरून काही पिशव्या समुद्रात फेकून दिल्या होत्या, मात्र तटरक्षक दलाने तत्परता दाखवत रात्रीच्या अंधारात या जहाजाला घेरले आणि ताब्यात घेतले. हा जहाज ब्राझीलपासून मेक्सिको आणि कराचीमार्गे थेट गुजरातपर्यंत आला होता, ज्यामुळे हे एक मोठे आंतरराष्ट्रीय रॅकेट असल्याचे स्पष्ट झाले आहे.
या प्रकरणात आतापर्यंत 3 विदेशी नागरिकांना अटक करण्यात आली आहे. तपास यंत्रणांनी दिलेल्या माहितीनुसार, अटक केलेल्या आरोपींमध्ये क्लॅविन चुकवुमा (तांझानिया), ब्यारुहांगा जेम्स (युगांडा) आणि जुम्मा नासिर उमर (नायजेरिया) यांचा समावेश आहे. कारवाई सुरू असताना एक आरोपी समुद्रात उडी मारून पळून जाण्याचा प्रयत्न करत असताना त्यालाही पकडण्यात आले, तर अन्य एकाचा शोध अद्याप सुरू आहे. हे कोकेन दिल्लीतील द्वारका परिसरात वास्तव्यास असलेल्या दोन व्यक्तींकडे पोहोचवले जाणार होते, अशी कबुली आरोपींनी चौकशीत दिली आहे.
गुजरात किनारपट्टीवर अमली पदार्थांची तस्करी रोखण्यासाठी सुरक्षा यंत्रणा अधिक सक्रिय झाल्या आहेत. ही एटीएस आणि कोस्ट गार्डची ही कारवाई अत्यंत महत्त्वाची मानली जात आहे. सध्या जप्त केलेले जहाज कच्छ बंदरावर आणले असून, या रॅकेटचे मुख्य सूत्रधार कोण आहेत, याचा सखोल तपास सुरू आहे.
