लोणी काळभोर, ता. 30 : लोणी काळभोर ग्रामपंचायत हद्दीतील माळी मळा परिसरात ड्राय क्लिनिंगचा व्यवसाय करणाऱ्या व्यावसायिकाने स्वतःच्या दुकानातील आतील खोलीत गळफास घेऊन आत्महत्या केल्याची धक्कादायक घटना शनिवारी (ता. 29) सकाळी नऊ वाजण्याच्या सुमारास उघडकीस आली. या घटनेने परिसरात खळबळ उडाली असून, आत्महत्येचे नेमके कारण अद्याप स्पष्ट झालेले नाही.
गुरुशांताप्पा सिद्धांप्पा मठ (वय 47, रा. लोणी काळभोर, ता. हवेली) असे आत्महत्या केलेल्या व्यावसायिकाचे नाव आहे. मिळालेल्या माहितीनुसार, विशाल काळभोर हे कामानिमित्त गुरुशांताप्पा मठ यांच्या अभंग ड्राय क्लिनिंग दुकानात गेले होते. त्यावेळी दुकानातील आतील खोलीच्या खिडकीला शर्टच्या साहाय्याने गळफास घेतलेल्या अवस्थेत मठ आढळून आले. ही बाब लक्षात येताच विशाल काळभोर यांनी तातडीने पोलिसांना माहिती दिली.
या घटनेची माहिती मिळताच लोणी काळभोर पोलिसांनी घटनास्थळी धाव घेतली. नागरिकांच्या मदतीने मठ यांना खाली उतरवून तातडीने लोणी काळभोर प्राथमिक आरोग्य केंद्रात नेण्यात आले. मात्र, डॉक्टरांनी तपासणी केल्यानंतर त्यांना मृत घोषित केले.पोलिसांनी मृतदेह ताब्यात घेऊन शवविच्छेदनासाठी पाठविला आहे. शवविच्छेदन अहवालानंतर मृत्यूचे नेमके कारण स्पष्ट होण्याची शक्यता आहे.
दरम्यान, गुरुशांताप्पा मठ हे मागील काही वर्षांपासून आजाराने त्रस्त असल्याची प्राथमिक माहिती समोर आली आहे. आजारपणामुळे आलेल्या नैराश्यातून त्यांनी हे टोकाचे पाऊल उचलले असावे, अशी प्राथमिक शक्यता व्यक्त केली जात आहे. मात्र, आत्महत्येमागील नेमके कारण काय, याचा तपास लोणी काळभोर पोलिसांकडून सुरू आहे.
