लोणी काळभोर, ता. 29 : विद्यार्थी हा शाळेचा अविभाज्य घटक असून, विद्यार्थ्यांच्या शैक्षणिक प्रगतीतूनच शाळेची आणि गावाची प्रगती साध्य होते. ग्रामीण भागातील विद्यार्थी शिष्यवृत्ती, क्रीडा तसेच विविध स्पर्धांमध्ये उल्लेखनीय कामगिरी करत आहेत. या विद्यार्थ्यांना प्रोत्साहन देण्यासाठी आणि त्यांच्या सर्वांगीण विकासासाठी हवेली पंचायत समितीच्या माध्यमातून आवश्यक ती मदत करण्यास आम्ही कटिबद्ध आहोत, अशी ग्वाही पंचायत समितीचे सभापती युवराज काकडे यांनी दिली.
प्रिंट व डिजिटल मीडिया पत्रकार संघटनेचे हवेली तालुकाध्यक्ष संदीप बोडके आणि श्लोक गणेश कुंजीर यांच्या वाढदिवसानिमित्त थेऊर (ता. हवेली) येथील जिल्हा परिषद प्राथमिक शाळा, तारमळा येथे विविध स्पर्धांचे आयोजन करण्यात आले होते. या स्पर्धांचा बक्षीस वितरण सोहळा बुधवारी (ता. 29) उत्साहात पार पडला. यावेळी विद्यार्थ्यांना मार्गदर्शन करताना सभापती काकडे बोलत होते. या कार्यक्रमाला पंचायत समितीच्या उपसभापती विद्या गायकवाड, माजी पंचायत समिती सदस्य कावेरी कुंजीर, शाळा व्यवस्थापन समितीच्या उपाध्यक्षा काजल टेमगिरे, सदस्य रेश्मा पवार, राजश्री कुंजीर, माजी ग्रामपंचायत सदस्य विनोद माळी, राजेश केरकर आदी मान्यवर उपस्थित होते.
कथालेखनात वीर भंडारी प्रथम; विश्वनाथ वाघमारेचे हस्ताक्षर स्पर्धेत यश
हवेली तालुकास्तरीय कथालेखन स्पर्धेत शाळेचा विद्यार्थी वीर सुमित भंडारी याने प्रथम क्रमांक पटकावला, तर तालुकास्तरीय हस्ताक्षर स्पर्धेत विश्वनाथ नामदेव वाघमारे याने द्वितीय क्रमांक मिळवला. या दोन्ही विद्यार्थ्यांचे सभापती युवराज काकडे यांनी विशेष कौतुक करून त्यांना पुढील वाटचालीसाठी शुभेच्छा दिल्या.
विद्यार्थ्यांमधील कलागुणांना वाव मिळावा, त्यांच्यातील आत्मविश्वास वाढावा आणि त्यांना विविध क्षेत्रांत प्रगतीची संधी मिळावी, या उद्देशाने अशा उपक्रमांचे आयोजन करण्यात आले होते. यापुढेही गणेश नारायण कुंजीर मित्र परिवाराच्या वतीने विविध सामाजिक व शैक्षणिक उपक्रम राबविण्यात येतील, असे गणेश कुंजीर यांनी सांगितले. या स्पर्धेतील सर्व विजेत्या विद्यार्थ्यांचे उपस्थित मान्यवरांनी अभिनंदन केले. विद्यार्थ्यांच्या कलागुणांना प्रोत्साहन देणारा हा उपक्रम उत्साहात पार पडला.
दिवाळी साहित्य विक्रीतून व्यावहारिक ज्ञानाचे धडे
विद्यार्थ्यांना केवळ पुस्तकी ज्ञान न मिळता प्रत्यक्ष व्यवहाराचे ज्ञान मिळावे, या उद्देशाने शाळेत दिवाळी साहित्य विक्रीची दुकाने उभारण्यात आली होती. या उपक्रमातून विद्यार्थ्यांना वस्तूंची विक्री, व्यवहार आणि आर्थिक देवाणघेवाण यांची प्राथमिक माहिती मिळाली. या स्पर्धा यशस्वी करण्यासाठी मुख्याध्यापिका हिरेमठ, परदेशी, कुदळे, कुटे, सरोदे, सूर्यवंशी सर, निर्मला मॅडम आणि तारू काकू यांनी विशेष सहकार्य केले. यावेळी विठ्ठल मोरे, सुखराज कुंजीर, मनसे नेते प्रशांत खांडे, सूरज सोनावणे, समर्थ बोडके, अमोल काकडे, बाळासाहेब गायकवाड यांच्यासह विद्यार्थी मोठ्या संख्येने उपस्थित होते.
चित्रकला स्पर्धेतील वर्गनिहाय विजेते (पहिला, दुसरा तिसरा)
पहिली : स्वामिनी अजित बोडके, सार्थक दीपक थोरात, सारधा कुमारी
दुसरी : स्नेहल दत्तात्रय कांबळे, अकिश अंकुश राठोड, विश्वराज दत्ता शिंदे
तिसरी : राधा कुमारी, मार्तंड गणेश पोपळे, श्रुती बालाजी ढावारे
चौथी : स्वराली संतोष तुपसौंदर, श्रीराज राम शेंडगे, श्रीनिथी लखन शेंडगे
पाचवी : कुणाल बापू निकम, देवांश अजय कुंजीर, सई राहुल कुंजीर
सहावी : आदिराज नानासाहेब खेंडकर, शंभूराजे विकास कुंजीर, श्रीजित स्वप्नील भोसले
सातवी : श्रीगणेश प्रवीण व्यवहारे, अंशुमन रणजित शिंदे, गायत्री नामदेव वाघमारे
