लोणीकंद, ता. 29 : माहेरून एक लाख रुपये आणण्याच्या मागणीसाठी विवाहितेचा शारीरिक व मानसिक छळ केल्याप्रकरणी पतीसह सासू आणि नणंदेविरोधात लोणीकंद पोलिस ठाण्यात तक्रार दाखल करण्यात आली आहे. पैशांची मागणी पूर्ण न केल्याने मारहाण, शिवीगाळ आणि जीवे मारण्याची धमकी दिल्याचा आरोप विवाहितेने तक्रारीत केला आहे.
याप्रकरणी पती नवीन उल्हास नागपुरे, सासू नुतन उल्हास नागपुरे आणि नणंद सोनाली सॅम्युअल यांच्याविरोधात तक्रार देण्यात आली आहे. तक्रारदार विवाहिता सध्या वाडेबोल्हाई येथे माहेरी राहत आहे.
पोलिसांनी दिलेल्या माहितीनुसार, 20 जानेवारी 2023 रोजी दोन्ही कुटुंबांच्या संमतीने विवाह नोंदणी पद्धतीने लग्न झाले. लग्नानंतर सुरुवातीचे दोन ते तीन महिने सासरच्या मंडळींचे वागणे चांगले होते. लग्न ठरण्यापूर्वी नोकरी करण्यास परवानगी देण्याचे आश्वासन देण्यात आले होते; मात्र लग्नानंतर पतीने नोकरी करण्यास नकार दिला. कपड्यांवरूनही सासू टोमणे मारत असल्याचे तक्रारीत म्हटले आहे. माहेरून एक लाख रुपये आणण्याची मागणी पतीने केली होती. विवाहितेने पैसे देण्यास नकार दिल्यानंतर पती आणि सासूने शिवीगाळ करून हाताने मारहाण केल्याचा आरोप आहे.
26 मे 2023 रोजी माहेरच्या आई-वडिलांशी संबंध ठेवण्यावरून वाद झाला असता पुन्हा मारहाण करण्यात आली. पोलिसांत तक्रार देण्यासाठी गेल्यानंतर पतीने आत्महत्येची धमकी दिल्याने आपण तक्रार न करताच घरी परतल्याचेही विवाहितेने नमूद केले आहे. फेब्रुवारी 2025 मध्ये विवाहितेला मुलगी झाली. मात्र, पती आणि सासूला मुलगा हवा असल्याने मुलगी झाल्यानंतर ते नाराज होते, असा आरोप तिने केला आहे. मुलगी आजारी पडल्यावर उपचारांसाठी तसेच तिच्या संगोपनासाठी लागणारा खर्च माहेरून आणण्यास सांगितले जात असल्याचे तक्रारीत म्हटले आहे.
दरम्यान, पतीला परदेशात जायचे असल्याने त्यासाठीही माहेरून एक लाख रुपये आणण्याची मागणी केली जात होती. पैसे देण्यास नकार दिल्यानंतर पतीकडून शिवीगाळ व मानसिक छळ केला जात असल्याचा आरोप विवाहितेने केला आहे. तसेच घरकाम आणि स्वयंपाकावरून नणंद व सासू टोमणे मारून अपमानित करत असल्याचेही तक्रारीत नमूद आहे. मार्च 2023 ते जून 2026 या कालावधीत पती, सासू आणि नणंद यांनी संगनमताने पैशांची मागणी करून शारीरिक व मानसिक छळ केल्याचे विवाहितेने तक्रारीत म्हटले आहे.
