पुणे : ‘आरोग्यवारी अल्ट्राग्रुप रन-२०२६’ या मॅरेथॉन स्पर्धेचे आयोजन २६ जुलै २०२६ रोजी करण्यात आले आहे. या स्पर्धेत सहभागी होणाऱ्या धावपटूंची सुरक्षितता आणि रस्त्यावरील वाहतूक कोंडी टाळण्यासाठी जिल्हाधिकारी जितेंद्र डुडी यांनी या मार्गावरील वाहतुकीत तात्पुरते बदल करण्याचे निर्देश दिले आहेत.
याबाबत अधिक माहिती अशी कि, सकाळी ४ ते दुपारी १२ या वेळेत: पुणे येथून सासवड आणि जेजुरीमार्गे सातारा, फलटण किंवा बारामतीकडे जाणारी वाहतूक पूर्णपणे बंद असणार आहे.
पर्यायी मार्ग: प्रवाशांनी सासवड-नारायणपूर-कापूरहोळ, सासवड-वीर फाटा-परिंचे-लोणंद किंवा सासवड-पानवडी-मेमाणे-पिसर्वे-सुपा या रस्त्यांचा वापर करावा.
स्थानिक चौकांमधील नियोजन: जेजुरी परिसरातील बेलसर फाटा, पारगाव मेमाणे चौक आणि कोथळे चौक या ठिकाणी वाहतुकीचे विशेष नियोजन करण्यात आले आहे.
बारामती शहरातील वाहतूक व्यवस्था:
बारामती शहर पोलीस ठाण्याच्या हद्दीत सकाळी ७ ते सायंकाळी ६ वाजेपर्यंत मॅरेथॉनचा मुख्य मार्ग वाहतुकीसाठी बंद राहील. हा मार्ग विराट हॉटेल, खंडोबानगर, कारभारी सर्कल, गुणवडी चौक, इंदापूर चौक, भिगवण चौक ते तीन हत्ती चौक असा असणार आहे.
तीन हत्ती चौक ते सम्यक चौक दरम्यानचा रस्ता दोन्ही बाजूंनी बंद राहील, मात्र तेथील नागरिकांसाठी सर्व्हिस रोड खुला असणार आहे
भिगवण, पाटस, मोरगाव आणि फलटणकडून येणाऱ्या गाड्या रिंगरोड, कोर्ट कॉर्नर, रेल्वे पूल, एमआयडीसी आणि कॅनॉल रोडवरून वळवण्यात आल्या आहेत.
सुपा पोलीस ठाण्याच्या हद्दीतील पुणे-बारामती, निरा-सुपा आणि केडगाव चौफुला मार्गांवरील गाड्याही इतर पर्यायी रस्त्यांवरून सोडल्या जातील.
या स्पर्धेचा पारितोषिक वितरण सोहळा सायंकाळी ५:३० वाजता बारामतीतील नटराज नाट्यमंदिर येथे पार पडणार आहे. नागरिकांनी आणि वाहनचालकांनी वाहतूक पोलिसांच्या सूचनांचे तंतोतंत पालन करून प्रशासनाला सहकार्य करावे, असे आवाहन जिल्हा प्रशासनाने केले आहे.
