Crime News: कोल्हापूर : कोल्हापूर जिल्ह्यातील हातकणंगले तालुक्यात एक धक्कादायक दुहेरी हत्याकांड उघडकीस आले आहे. शेतजमिनीच्या वादातून वडील आणि धाकट्या भावाची हत्या केल्याची घटना समोर आली असून या प्रकरणामुळे परिसरात मोठी खळबळ उडाली आहे. विशेष म्हणजे, ही हत्या घरातीलच थोरल्या मुलाने केल्याचा आरोप आहे. (Double Murder Case)
मिळालेल्या माहितीनुसार, या घटनेत मारुती बंडू कुंडले (वय 72) आणि त्यांचा मुलगा शितल मारुती कुंडले (वय 40) यांचा मृत्यू झाला आहे. या प्रकरणी पोलिसांनी संभाजी मारुती कुंडले (वय 47) याला अटक केली आहे. कुंडले कुटुंबात गेल्या काही वर्षांपासून शेतजमिनीच्या वाटणीवरून वाद सुरू होता. यामुळे घरात नेहमीच तणावाचे वातावरण होते.
रविवारी सायंकाळी या वादाने पुन्हा उग्र रूप घेतले. संभाजी, शितल आणि त्यांचे वडील मारुती यांच्यात जोरदार वाद झाला. या वादातून संतापलेल्या संभाजीने धारदार शस्त्राने वडील आणि भावावर हल्ला केला. हल्ला इतका गंभीर होता की दोघेही रक्ताच्या थारोळ्यात कोसळले आणि त्यांचा जागीच मृत्यू झाला.
घटनेची माहिती मिळताच हातकणंगले पोलिसांनी तातडीने घटनास्थळी धाव घेतली. पोलिसांनी पंचनामा करून मृतदेह शवविच्छेदनासाठी पाठवले आहेत. आरोपी संभाजी याला ताब्यात घेऊन त्याची चौकशी सुरू आहे. या घटनेमुळे गावात भीती आणि तणावाचे वातावरण निर्माण झाले आहे.
पोलिस या प्रकरणाचा अधिक तपास करत असून नेमके कारण आणि इतर बाबींची माहिती पुढील चौकशीत स्पष्ट होणार आहे. कुटुंबातील वादातून घडलेली ही घटना सर्वांनाच धक्का देणारी ठरली आहे.
