अकलूज: वंचित बहुजन आघाडीने मला उमेदवारी दिल्यामुळे माढा मतदारसंघात भाजपचे सीट धोक्यात आले असल्याचे प्रतिपादन रमेश बारसकर यांनी अकलूज येथे केले.
वारसकर म्हणाले, मी स्वच्छ चारित्र्याचा उमेदवार आहे. मी कोणी साखर कारखानदार, शिक्षणसम्राट नाही. या मतदारसंघातील साखर कारखानदारांनी काटे, रिकव्हरी मारुन पैसे कमावले आहेत. त्यांच्यावर लोक नाराज आहेत. माझे व्हिजन स्पष्ट आहे. मला निवडून दिल्यास सर्वप्रथम मी जीएसटी प्रणालीमध्ये बदल करेन. नागरिकांना वीज, शिक्षण मोफत देण्याचा प्रयत्न करेन. सर्व साखर कारखान्यांच्या वजन काट्यावर सरकारी माणसाची नियुक्ती करुन शेतकऱ्यांची लूट थांबवण्याचा प्रयत्न केला जाईल. प्रत्येक मुलींच्या नावावर २५ लाख रुपयांची एफडी करण्याचा प्रयत्न केला जाईल.
दुधाला, कांद्याला व उसाला वाढीव दर मिळावा म्हणून मी यापूर्वी आंदोलने केली आहेत. आमच्या दूध दर आंदोलनामुळेच सरकारने अनुदान जाहीर केले. मला संसदेत पाठवल्यास १८ वर्षावरील प्रत्येक व्यक्तीस प्रत्येक निवडणूक लढण्याचा अधिकार प्राप्त करुन देईन.
माढा लोकसभा मतदारसंघामध्ये मराठा, धनगर, ओबीसी, एससी मतदारांची संख्या मोठी आहे. माझ्यामुळे भाजप आणि राष्ट्रवादीच्या मतांची विभागणी होणार असल्याने माझ्या विजयाचा मार्ग सुकर झाला असल्याचे बारसकर म्हणाले. वंचितचे सर्व स्टार प्रचारक या मतदारसंघात प्रचारामध्ये उतरणार आहेत. त्यावेळी येथील वातावरण निश्चित बदलेल याची खात्री असल्याचे बारसकर म्हणाले.
