पाचगणी: पर्यटननगरी पाचगणी येथील टेबल लॅंड पठारावर पर्यटकांना चांगल्या पायाभूत सुविधा उपलब्ध करून देण्यासाठी प्रादेशिक पर्यटन विकास योजना २०२३-२४ मधून वाहनतळ विकसित करण्याच्या कामाचा भूमिपूजन समारंभ जिल्हाधिकारी जितेंद्र डुडी यांच्या उपस्थितीत तर वाई-खंडाळा-महाबळेश्वर मतदारसंघाचे आमदार मकरंद पाटील यांच्या हस्ते झाला.
यावेळी जिल्हा बँकेचे संचालक राजेंद्र राजपुरे, पाचगणी नगरपरिषदेचे मुख्याधिकारी तथा प्रशासक निखिल जाधव, माजी नगराध्यक्ष शेखर कासुर्डे, नानासाहेब कासुर्डे, माजी उपनगराध्यक्ष नारायण बिरामणे, माजी नगरसेवक प्रवीण बोधे, समाजसेवक प्रकाश गोळे, टेबल लॅंड व्यापारी असोसिएशनचे अध्यक्ष सुधाकर बगाडे, उपाध्यक्ष नामदेव चोपडे, दिलीप कांबळे, हेन्री जोसेफ, डॉ. बाबासाहेब आंबेडकर उत्सव समितीचे अध्यक्ष सुनील बगाडे, मिथुन (आबा) नायकवडी आदी मान्यवर उपस्थित होते.
काम पूर्ण होण्याचा कालावधी सहा महिन्यांचा
या वाहनतळावर लहान मोठ्या बसेस व चारचाकी वाहने अंदाजित ११५ वाहनांची क्षमता असणार असून, काम पूर्ण होण्याचा कालावधी सहा महिन्यांचा आहे. कामााची एकूण अंदाजित रक्कम १ कोटी १३ लाख ११ हजार १९३ रुपये आहे. यावेळी आमदार मकरंद पाटील व जिल्हाधिकारी जितेंद्र डुडी यांनी पठारावरील तलावाच्या विकास कामाचा आढावा घेतला. घोडे व घोडागाडी व्यावसायिकांच्या अडचणी जाणून घेतल्या.
