केडगाव : गोरगरीब ग्राहकांसाठी ग्राहक पंचायत पुणे संस्थेने अतिशय मोलाची कामगिरी करत भविष्यात अनेक लोकोपयोगी व जनहितार्थ कामे करुन समाज शोषणमुक्त करण्यासाठी प्रयत्न करावेत. तसेच ग्राहक पंचायत कोणा विक्रेत्याच्या विरोधात नसून, ती अनुचित व्यापार करणाऱ्या प्रवृत्ती सुधारण्यासाठी प्रयत्न करत आहे. सामान्य लोकांना न्याय देण्याचे प्रामाणिकपणे काम करावे, असे निवृत्त जिल्हा न्यायाधीश बाळासाहेब खराडे यांनी सांगितले.
तीर्थक्षेत्र रांजणगाव महागणपती सभागृहामध्ये ग्राहक पंचायत संस्था पुणे जिल्हा या राज्यव्यापी नवीन संस्थेचा उद्घाटन समारंभ पार पडला. यावेळी आदरणीय ग्राहकतीर्थ बिंदू माधव जोशी यांच्या विचाराने व सोबत काम करून प्रेरित होऊन सामाजिक कार्यकर्ते अशोक रावसाहेब भोरडे यांनी आपल्या सहकाऱ्यांना सोबत घेऊन ग्राहकांचे हित जोपासण्यासाठी व ग्राहकांना शोषणमुक्त करण्यासाठी ही संस्था स्थापन केली आहे.
या निमित्ताने निवृत्त जिल्हा न्यायाधीश बाळासाहेब खराडे, शिरूर तहसीलदार बाळासाहेब म्हस्के, उपकार्यकारी अभियंता महावितरण शिक्रापूरचे नितीन महाजन, शाखा अभियंता पाचुंदकर, रांजणगाव देवस्थानच्या अध्यक्षा स्वाती पाचुंदकर, ग्राहक पंचायत पुणेचे संस्थापक अध्यक्ष अशोक भोरडे, राज्य उपाध्यक्ष जनार्दन पांढरमिसे, यांच्या हस्ते दीप प्रज्वलन करण्यात आले.
या कार्यक्रमासाठी लोणीकंद पोलीस स्टेशनचे वरिष्ठ पोलीस निरीक्षक विश्वजीत काईंगडे, रांजणगाव एमआयडीसी पोलीस स्टेशनचे पोलीस निरीक्षक महादेव वाघमोडे, शिक्रापूर पोलीस ठाण्याचे पोलीस निरीक्षक दीपरतन गायकवाड, वनपरिक्षेत्र शिरूरचे प्रताप जगताप, सहाय्यक निबंधक सहकारी संस्था शिरूरचे अरुण साकोरे या मान्यवरांनी संस्थेच्या उद्घाटनप्रसंगी उपस्थित होते.
या कार्यक्रमाचे अध्यक्ष म्हणून निवृत्त जिल्हा न्यायाधीश यांनी उपस्थितांना कायद्याविषयी मार्गदर्शन केले. या कार्यक्रमासाठी ॲड. बाबुराव ढमढेरे, माजी सरपंच प्रवीण आव्हाळे , ॲड.गणेश तोडकर, उद्योजक विजय करपे ,राहुल करपे, सामाजिक कार्यकर्ते अरुणकुमार मोट यांच्यासह शिरूर, हवेली, दौंड, जुन्नर, खेड या तालुक्यातून मोठ्या प्रमाणात ग्राहक पंचायतचे कार्यकर्ते व नागरिक उपस्थित होते.
