कुर्डूवाडी (सोलापूर) : स्वतःला संत बाळूमामांचा अवतार सांगून भक्तांची फसवणूक करणाऱ्या मनोहर भोसले उर्फ ‘मनोहर मामा’ यांच्या अडचणीत आणखी वाढ झाली आहे. महिला भक्तेचे लैंगिक शोषण केल्याप्रकरणी करमाळा पोलीस ठाण्यात त्याच्याविरोधात दुसरा बलात्काराचा गुन्हा दाखल करण्यात आला असून, सोलापूर ग्रामीण पोलिसांनी त्याला पुण्यातून अटक केली आहे. न्यायालयाने त्याला पोलीस कोठडी सुनावली आहे.
30 वर्षीय पीडित महिलेने 25 मे रोजी करमाळा पोलिसांकडे दिलेल्या फिर्यादीनुसार, जानेवारी 2025 मध्ये आर्थिक परिस्थिती अत्यंत बिकट असल्याने तिच्या एका मैत्रिणीने वडाचीवाडी (ता. हवेली) येथील मनोहर मामाच्या आश्रमात जाण्याचा सल्ला दिला होता. परिस्थिती सुधारेल, असे सांगत तिला आश्रमात नेण्यात आले.
फिर्यादीनुसार, पीडित महिलेने चार अमावस्यांच्या वार्या केल्या. चौथ्या अमावस्येनंतर मनोहर मामाचा सेवक ‘नाथबाबा’ याने पुढील मोठ्या पूजेसाठी करमाळा तालुक्यातील घोटी येथे येण्यास सांगितले. त्यानुसार 28 मे 2025 रोजी पीडिता घोटी येथील मठात पोहोचली. तेथे नाथबाबा, चालक आणि मनोहर मामा उपस्थित होते.
महिलेने पूजेसाठी 11 हजार रुपये दिल्यानंतर तिला एका खोलीत बसवण्यात आले. काही वेळाने मनोहर भोसले त्या खोलीत आला आणि पूजा करण्याच्या नावाखाली तिच्याशी जबरदस्ती करण्याचा प्रयत्न केल्याचा आरोप फिर्यादीत करण्यात आला आहे. महिलेने विरोध करून पूजा नको असल्याचे स्पष्ट सांगितले, तरीही मंत्रोच्चार करत तिच्या इच्छेविरुद्ध शारीरिक संबंध ठेवल्याचा गंभीर आरोप करण्यात आला आहे.
या प्रकरणी करमाळा पोलिसांनी मनोहर भोसले, नाथबाबा आणि एका अनोळखी चालकाविरुद्ध भारतीय न्याय संहिता 2023 तसेच महाराष्ट्र नरबळी, अघोरी प्रथा आणि काळी जादू प्रतिबंधक कायद्यान्वये गुन्हा दाखल केला आहे. फौजदार ज्ञानेश्वर दळवी पुढील तपास करत आहेत.
