पुणे : पोलिसांना चकवा देत परदेशात फरार झालेला कुख्यात गुंड निलेश घायवळ लंडनमध्ये राहूनही पुण्यातील आपला कारभार सांभाळत असल्याचा संशय व्यक्त केला जात आहे. याच पार्श्वभूमीवर त्याचा भाऊ सचिन घायवळ याला अटक करण्यात आल्यानंतर तपासात काही महत्त्वाची माहिती समोर आली आहे.
पुणे पोलिसांनी न्यायालयात दिलेल्या माहितीनुसार, निलेश घायवळ आणि त्याचा भाऊ सचिन घायवळ हे आयफोनच्या फेसटाईम अॅपच्या माध्यमातून नियमित संपर्कात होते. निलेश घायवळ परदेशात असतानाही पुण्यातील घडामोडी, आर्थिक व्यवहार आणि इतर बाबींवर तो भावाच्या माध्यमातून लक्ष ठेवत असल्याचा संशय तपास यंत्रणांना आहे.
निलेश घायवळ हा काही महिन्यांपूर्वी पासपोर्टवरील स्पेलिंगमधील तफावतीचा फायदा घेत देशाबाहेर पळून गेला होता. त्यानंतर तो लंडनमध्ये असल्याची माहिती समोर आली. त्याच्या शोधासाठी आंतरराष्ट्रीय स्तरावरही हालचाली करण्यात आल्या असून इंटरपोलमार्फत नोटीस जारी करण्यात आली होती.
दरम्यान, सुमारे नऊ महिन्यांपासून फरार असलेल्या सचिन घायवळला पोलिसांनी राजस्थानमधून ताब्यात घेत पुण्यात आणले. न्यायालयाने सुरुवातीला त्याला पोलीस कोठडी सुनावली होती. तपासादरम्यान समोर आलेल्या नव्या माहितीच्या आधारे पोलिसांनी कोठडी वाढविण्याची मागणी केली आणि न्यायालयाने त्याला आणखी तीन दिवसांची पोलीस कोठडी मंजूर केली.
तपासादरम्यान सचिन घायवळकडून चार मोबाईल फोन, एक लॅपटॉप आणि पाच पेनड्राइव्ह जप्त करण्यात आल्या आहेत. या इलेक्ट्रॉनिक उपकरणांची तपासणी सुरू असून त्यातून निलेश घायवळच्या संपर्कांचे आणि व्यवहारांचे धागेदोरे मिळण्याची शक्यता पोलिसांनी व्यक्त केली आहे.
पोलिसांच्या मते, निलेश घायवळ परदेशात असला तरी तो स्थानिक नेटवर्कच्या माध्यमातून पुण्यातील हालचालींवर नियंत्रण ठेवत होता का, याचा तपास सुरू आहे. तसेच त्याने गुन्हेगारी कारवायांचे नियोजन किंवा समन्वय परदेशातून केला होता का, याचाही शोध घेतला जात आहे.
सचिन घायवळविरोधात खून, खुनाचा प्रयत्न, खंडणी आणि धमकी देण्यासारखे गंभीर गुन्हे दाखल आहेत. त्याच्या चौकशीतून निलेश घायवळच्या हालचाली, आर्थिक व्यवहार आणि परदेशातून सुरू असलेल्या कथित संपर्क साखळीबाबत आणखी माहिती समोर येण्याची शक्यता आहे.
