पुणे : पुण्यामध्ये डीजेमुक्त सण-उत्सव आणि ध्वनीप्रदूषणाविरोधात लढा देणारे सामाजिक कार्यकर्ते विद्यानंद बापट यांना मारहाण केल्याची घटना समोर आल्याने पुण्यातील वातावरण प्रचंड तापलं आहे.. या मारहाण प्रकरणानंतर आता विद्यानंद बापट यांच्या आई-वडिलाचीं प्रतिक्रिया समोर आली आहे.
रत्नागिरीत राहणाऱ्या विद्यानंद बापट यांच्या आई-वडिलांना मारहाणीची ही बातमी समजताच मोठा धक्का बसला. विद्यानंद यांच्या वडिलांनी या भ्याड हल्ल्याचा कडक शब्दांत निषेध नोंदवला.”डीजेमुक्त गणेशोत्सव साजरा व्हावा, ही माझ्या मुलाची भूमिका अजिबात चुकीची नाही. त्याची मागणी पूर्णपणे रास्त आणि समाजाच्या हिताची आहे. आज त्याच्यावर झालेला हा हल्ला अतिशय निंदनीय आहे,” अशा शब्दांत वडिलांनी आपला राग व्यक्त केला.
या हल्ल्यानंतर बापट कुटुंबीयांच्या सुरक्षेचा प्रश्न ऐरणीवर आला आहे. पुण्यात सामाजिक काम करणाऱ्या कार्यकर्त्यांवरच असे हल्ले होत असतील, तर त्यांच्या जीवाला धोका निर्माण होतो. त्यामुळे प्रशासनाने विद्यानंद बापट यांना तातडीने पोलीस संरक्षण पुरवावे, अशी जोरदार मागणी आता बापट कुटुंबियासह सर्व स्तरातून जोर धरू लागली आहे.
गेल्या अनेक वर्षांपासून विद्यानंद बापट हे शहरातील वाढत्या ध्वनीप्रदूषणाविरोधात आणि डीजेच्या अनियंत्रित वापराला आळा घालण्यासाठी कायदेशीर तसेच सामाजिक पातळीवर लढा देत आहेत. या हल्ल्यामुळे सामाजिक कार्यकर्त्यांच्या सुरक्षेबाबत गंभीर प्रश्न उपस्थित झाले असून, आरोपीवर कडक कारवाई करण्याची मागणी सर्वस्तरातून होत आहे.
