पिंपरी, पुणे : पिंपरीतील विठ्ठलनगर परिसरात जुन्या वादातून २३ वर्षीय तरुणावर कोयत्याने हल्ला करून जखमी केल्याची घटना समोर आली आहे. शनिवारी रात्री सुमारे ११ वाजण्याच्या सुमारास हा प्रकार घडला. याप्रकरणी संत तुकारामनगर पोलीस ठाण्यात तिघांविरुद्ध गुन्हा दाखल करण्यात आला आहे.
या प्रकरणी विशाल सुभाष पौळ (वय २३, रा. अजमेरा) यांनी पोलिसांत फिर्याद दिली आहे. फिर्यादीनुसार, रोशन रवींद्र कांबळे (वय २१), नेपाळी समीर आणि एका अनोळखी तरुणाने जुन्या वादातून विशाल यांना शिवीगाळ केली आणि धक्काबुक्की केली.
त्यानंतर रोशन कांबळे याने विशाल यांच्या पाठीवर कोयत्याने वार केल्याचा आरोप आहे. तसेच, इतर आरोपींनी त्यांच्या उजव्या डोळ्याजवळ मारहाण करून त्यांना जखमी केल्याचे फिर्यादीत नमूद आहे.
घटनेनंतर या प्रकरणी संत तुकारामनगर पोलीस ठाण्यात तिघांविरुद्ध गुन्हा दाखल करण्यात आला आहे. हल्ल्यामागील नेमके कारण आणि घटनेशी संबंधित इतर बाबींचा पोलीस तपास करत आहेत.
