दौंड: दौंड तालुक्यात राग आणि सुडाच्या भावनेतून एका निष्पाप चिमुकलीचा जीव घेतल्याची मन सुन्न करणारी घटना समोर आली आहे. आईसोबत झालेल्या वादाचा राग मनात धरून एका व्यक्तीने चिमुकलीला विहिरीत ढकलून दिल्याचा आरोप आहे. या प्रकरणी यवत पोलिसांनी आरोपीला अटक केली असून दौंड न्यायालयाने त्याला शनिवारपर्यंत (५ सप्टेंबर) पोलीस कोठडी सुनावली आहे.
गोरख रामसिंग वसावे असे अटक करण्यात आलेल्या आरोपीचे नाव आहे. दौंड तालुक्यातील एका गावात आरोपीचा चिमुकलीच्या आईसोबत वाद झाला होता. या वादाचा राग मनात धरून आरोपीने चिमुकलीला विहिरीत ढकलून दिल्याची माहिती तपासात समोर आली आहे. या घटनेनंतर आरोपी घटनास्थळावरून पसार झाला होता.
घटनेची माहिती मिळाल्यानंतर यवत पोलिसांनी तपासाला सुरुवात केली. पोलिसांनी आरोपी गोरख वसावे याला ताब्यात घेतल्यानंतर त्याच्याकडे चौकशी केली. आईसोबत झालेल्या वादातून चिमुकलीला विहिरीत ढकलल्याची माहिती त्याने दिल्याचे पोलिसांकडून सांगण्यात आले आहे.
आरोपीला दौंड न्यायालयात हजर करण्यात आले. न्यायालयाने त्याला शनिवारपर्यंत पोलीस कोठडी सुनावली आहे. या प्रकरणाचा पुढील तपास यवत पोलीस करीत आहेत.
दरम्यान, चिमुकलीच्या पार्थिवाचे बुधवारी शवविच्छेदन करण्यात आले. सायंकाळी सहा वाजता मृतदेह नातेवाईकांच्या ताब्यात देण्यात आला. कुटुंबीयांनी अंत्यसंस्कारासाठी पार्थिव रुग्णवाहिकेतून नंदुरबार जिल्ह्यातील मूळ गावी नेण्याचा निर्णय घेतला आहे.
या घटनेमुळे चिमुकलीच्या कुटुंबावर दुःखाचा डोंगर कोसळला आहे. तब्बल चार दिवसांनंतर तिच्यावर मूळ गावी अंत्यसंस्कार करण्यात येणार आहेत. क्षुल्लक वादाचा राग एका निष्पाप जीवावर काढल्याने या घटनेबाबत परिसरात संताप व्यक्त केला जात आहे.
