सोलापूर: बीडचे माजी उपसरपंच गोविंद बर्गे यांच्या आत्महत्येने महाराष्ट्र हादरला होता. एका नर्तिकेच्या प्रेमात आपले आयुष्य उद्ध्वस्त करून घेतलेल्या बर्गे यांनी स्वतःवर गोळी झाडून जीवन संपवले. आता याच प्रकरणाला एक अतिशय धक्कादायक वळण मिळाले आहे. ज्या नर्तिकेमुळे बर्गे यांनी टोकाचे पाऊल उचलले, ती चक्क एका मोठ्या सेक्स रॅकेटमध्ये सक्रिय असल्याचे पोलीस तपासात उघड झाले आहे.
नेमकी घटना काय?
माढा तालुक्यातील मोडनिंब येथे पोलीस ठाण्यापासून हाकेच्या अंतरावर असलेल्या ‘स्वरांजली कला केंद्र’ या नावाखाली देहविक्री व्यापाराचा अड्डा चालवला जात होता. टेंभुर्णी पोलिसांनी 15 मार्च रोजी या केंद्रावर धाड टाकली आणि तिथले भीषण वास्तव समोर आले. या कारवाईत पोलिसांनी 25 तरुणींची नरकयातनेतून मुक्तता केली. धक्कादायक म्हणजे, गोविंद बर्गे यांच्या आत्महत्येला कारणीभूत ठरलेली नर्तिका पूजा गायकवाड हिनेही याबाबत कबुली पोलिसांना दिली आहे.
वरवर सांस्कृतिक कार्यक्रम वाटणाऱ्या या कला केंद्रात प्रत्यक्षात अश्लील पार्ट्यांचे आणि देहविक्रीचे रॅकेट सुरू होते. श्रीमंत आणि ‘हौशे-नवशे’ ग्राहकांना आकर्षित करण्यासाठी नृत्याचा बनाव रचला जात असे, पण पडद्याआड या तरुणींना वेश्याव्यवसायाच्या दलदलीत ढकलले जात होते. समोर आलेल्या माहितीनुसार, पिडीत तरुणींना बाहेरून आणून इथे डांबून ठेवले जात असल्याची माहिती तपासात समोर आली आहे.
