Missing Link Project : पुणे : मुंबई आणि पुणे या दोन शहरांमधील अंतर कमी करणाऱ्या आणि प्रवाशांचा वेळ वाचवणाऱ्या ‘यशवंतराव चव्हाण मुंबई-पुणे द्रुतगती मार्गा’वरील बहुप्रतिक्षित “मिसिंग लिंक” प्रकल्पाचे काम अखेर पूर्ण झाले आहे. महाराष्ट्र दिनाचे औचित्य साधून येत्या 1 मे रोजी या मार्गाचे लोकार्पण होणार असून, यामुळे खंडाळा घाटातील जीवघेणी वाहतूक कोंडी आणि पावसाळ्यातील दरडींचा धोका कायमचा टळणार आहे. Missing Link Project
सध्या मुंबईहून पुण्याला जाताना लोणावळा-खंडाळा घाटातून प्रवास करावा लागतो. या नागमोडी वळणांच्या घाटात अनेकदा अवजड वाहनांमुळे वाहतूक कोंडी होते. तसेच पावसाळ्यात दरडी कोसळण्याचे प्रकार घडत असल्याने हा प्रवास धोकादायक ठरत होता. मात्र, आता या 13.3 किमी लांबीच्या ‘मिसिंग लिंक’मुळे मुंबई-पुणे प्रवासातील वेळ तब्बल 30 मिनिटांनी कमी होणार आहे. Missing Link Project
प्रकल्पाची वैशिष्ट्ये आणि आव्हाने
जगातील सर्वात रुंद बोगदा या प्रकल्पांतर्गत उभारण्यात आलेला बोगदा हा जगातील सर्वात रुंद बोगदा असून, तो अभियांत्रिकीचा एक अद्भूत नमुना मानला जात आहे. महाराष्ट्र राज्य रस्ते विकास महामंडळाने (MSRDC) सुमारे ६,६९५ कोटी रुपये खर्चून हा प्रकल्प पूर्ण केला आहे. या प्रकल्पाचे काम ऑगस्ट २०१८ मध्ये सुरू झाले होते. कोविड संकट, खंडाळा घाटातील मुसळधार पाऊस आणि वेगवान वाऱ्यामुळे या कामाला विलंब झाला. मात्र, आता हे काम १०० टक्के पूर्ण झाले आहे. Missing Link Project
पर्यटकांनाही मोठा दिलासा
लोणावळा-खंडाळा परिसरात पर्यटनासाठी जाणाऱ्या नागरिकांना अनेकदा तासनतास वाहतूक कोंडीत अडकून पडावे लागत असे. आता नवीन मार्ग सुरू झाल्यामुळे महामार्गावरील वाहतुकीचा ताण विभागला जाईल आणि पर्यटकांनाही सुखकर प्रवास करता येईल. 1 मे पासून हा मार्ग सर्वसामान्यांसाठी खुला होणार असल्याने पुणे-मुंबई दरम्यान ये-जा करणाऱ्या हजारो प्रवाशांमध्ये आनंदाचे वातावरण आहे. Missing Link Project
