Donald Trump : मुंबई, ता. 26 : अमेरिकेचे माजी राष्ट्राध्यक्ष डोनाल्ड ट्रम्प यांच्यावर पुन्हा एकदा जीवघेणा हल्ला झाल्याची धक्कादायक घटना समोर आली आहे. वॉशिंग्टनमधील हिल्टन या आलिशान हॉटेलमध्ये ‘व्हाईट हाऊस करस्पाँडंट्स असोसिएसन’च्या डिनर पार्टीमध्ये ट्रम्प पत्नी मेलेनिया ट्रम्प यांच्यासह उपस्थित असताना एका हल्लेखोराने गोळीबार केला. सुदैवाने, या हल्ल्यातून ट्रम्प थोडक्यात बचावले असून सुरक्षा यंत्रणांनी त्यांना सुरक्षित स्थळी हलवले आहे. Donald Trump
डिनर पार्टीचा कार्यक्रम सुरू असताना डोनाल्ड ट्रम्प आणि मेलेनिया ट्रम्प व्यासपीठावर मान्यवरांसह बसलेले होते. व्हायरल झालेल्या व्हिडिओनुसार, ट्रम्प यांचा एक अधिकारी त्यांना एका कागदावरील मजकूर दाखवत असतानाच सभागृहात अचानक गोंधळ सुरू झाला. समोरच्या रांगेतून मोठे आवाज ऐकू आले, जे नंतर गोळीबाराचे असल्याचे स्पष्ट झाले. यावेळी सभागृहातील उपस्थित पाहुण्यांमध्ये एकच पळापळ आणि घबराट निर्माण झाली. Donald Trump
गोळीबाराचा आवाज येताच ट्रम्प यांच्या सुरक्षेसाठी तैनात असलेल्या सिक्रेट सर्व्हिसच्या जवानांनी तात्काळ व्यासपीठाचा ताबा घेतला. त्यांनी डोनाल्ड आणि मेलेनिया ट्रम्प यांना मानवी साखळी करून सुरक्षितपणे बाहेर काढले. त्यानंतर संपूर्ण हिल्टन हॉटेलचा ताबा घेऊन सुरक्षा दलांनी झाडाझडती सुरू केली आणि उपस्थितांनाही सुरक्षित बाहेर काढले. Donald Trump
या गोळीबार प्रकरणी पोलिसांनी कोल टोमस ॲलन नावाच्या २७ वर्षीय संशयित व्यक्तीला अटक केली आहे. तो कॅलिफोर्नियातील टोरन्सचा रहिवासी असल्याचे समजते. न्यूयॉर्क पोस्टच्या स्तंभलेखिका कॅरोल मार्कोविझ यांनी सोशल मीडियावर पोस्ट शेअर करत या हल्लेखोराची ओळख स्पष्ट केली आहे. Donald Trump
दरम्यान, घटनेनंतर प्रसारमाध्यमांशी बोलताना डोनाल्ड ट्रम्प यांनी सांगितले की, “सुरक्षा दलांनी अतिशय जलद आणि चोख कामगिरी बजावली. हल्लेखोराचे मुख्य लक्ष्य मीच होतो, मात्र तो एक विकृत व्यक्ती होता.” विशेष म्हणजे, या हल्ल्यामागे इराणचा हात असल्याचा दावा त्यांनी फेटाळून लावला आहे. उधळला गेलेला हा कार्यक्रम येत्या महिन्याभरात पुन्हा आयोजित करण्यात येईल आणि लवकरच सविस्तर पत्रकार परिषद घेतली जाईल, असेही त्यांनी स्पष्ट केले. Donald Trump
