Accident News : कोल्हापूर : शहराजवळील हातकणंगले तालुक्यात रविवारी सायंकाळी घडलेल्या भीषण अपघाताने परिसरात हळहळ व्यक्त केली जात आहे. तळसंदे-वाठार रस्त्यावर झालेल्या तिहेरी अपघातात एकाच कुटुंबातील वडील आणि लहान मुलाचा मृत्यू झाला, तर आई आणि मुलगी गंभीर जखमी झाल्या आहेत. या घटनेमुळे परिसरात शोककळा पसरली आहे.
मिळालेल्या माहितीनुसार, उदय जाधव हे आपल्या कुटुंबासोबत दुचाकीवरून यात्रेसाठी जात होते. त्यांच्या सोबत पत्नी आणि दोन मुले होती. यावेळी भरधाव वेगाने येणाऱ्या एका कारने सलग तीन दुचाकींना जोरदार धडक दिली. या अपघातात पाच वर्षांच्या मुलाचा जागीच मृत्यू झाला, तर गंभीर जखमी झालेल्या उदय यांचा उपचारादरम्यान मृत्यू झाला. या घटनेत पत्नी आणि मुलगी गंभीर जखमी असून त्यांच्यावर रुग्णालयात उपचार सुरू आहेत.
अपघातानंतर परिसरात एकच गोंधळ उडाला. स्थानिक नागरिकांनी तत्काळ मदत करत जखमींना रुग्णालयात दाखल केले. मात्र, वडील आणि मुलाचा जीव वाचवता आला नाही. या दुर्दैवी घटनेमुळे कुटुंबावर मोठे संकट कोसळले आहे.
पोलिसांनी दिलेल्या माहितीनुसार, संबंधित कार चालक मद्यधुंद अवस्थेत वाहन चालवत होता. अपघात घडल्यानंतरही त्याने वाहन न थांबवता पळून जाण्याचा प्रयत्न केला. दरम्यान, त्याने आणखी काही वाहनांना धडक दिल्याची माहिती समोर आली आहे. या अपघातात इतर काही जणही जखमी झाले आहेत.
या प्रकरणी पोलिसांनी गुन्हा दाखल केला असून आरोपी चालकाचा शोध सुरू आहे. या घटनेमुळे रस्ते सुरक्षेबाबत पुन्हा एकदा प्रश्न उपस्थित झाला असून नागरिकांनी वाहतूक नियमांचे पालन करण्याचे आवाहन केले जात आहे.
