नाशिक: बारा ज्योतिर्लिंगांपैकी एक असलेल्या त्र्यंबकेश्वर मंदिर येथे भाविकांच्या श्रद्धेला धक्का देणारा गंभीर प्रकार उघडकीस आला आहे. दर्शनासाठी लांब रांगेत उभ्या असलेल्या भाविकांना फसवून अवघ्या 10 मिनिटांत दर्शन घडवून आणण्याचे आमिष दाखवत प्रत्येकी 3000 रुपये उकळणाऱ्या टोळीचा नाशिक ग्रामीण पोलीस यांनी पर्दाफाश केला आहे. या प्रकरणात देवस्थान ट्रस्टचा विश्वस्त आणि राष्ट्रवादी (शरद पवार गट) नेते पुरुषोत्तम कडलग तसेच गोटीराम पेहरे यांना अटक करण्यात आली आहे.
गेल्या काही दिवसांपासून पैशांच्या बदल्यात जलद दर्शन दिले जात असल्याच्या तक्रारी पोलिसांकडे येत होत्या. या पार्श्वभूमीवर पोलीस अधीक्षक बाळासाहेब पाटील यांच्या मार्गदर्शनाखाली पोलिसांनी स्टिंग ऑपरेशन राबवले. यामध्ये पोलीसच भाविक बनून मंदिर परिसरात गेले होते. एका दिवसात तीन वेगवेगळ्या प्रकरणांमध्ये प्रत्येकी 3000 रुपये घेऊन दर्शन दिले जात असल्याचे पुराव्यासह स्पष्ट झाले. कारवाईदरम्यान एका एजंटला ताब्यात घेतल्यानंतर या रॅकेटचे धागेदोरे थेट कडलग यांच्यापर्यंत पोहोचल्याचे समोर आले.
या प्रकरणात अटक करण्यात आलेल्या कडलग यांना नाशिक जिल्हा सत्र न्यायालयात हजर करण्यात आले. तपासाची व्याप्ती मोठी असल्याचे सांगत सरकारी वकिलांनी अधिक कोठडीची मागणी केली होती. मात्र न्यायालयाने प्रकरणाचे गांभीर्य लक्षात घेऊन त्यांना 7 दिवसांची पोलीस कोठडी सुनावली आहे.
दरम्यान, या प्रकरणाला राजकीय रंगही चढला आहे. भाजप अध्यात्मिक आघाडीचे प्रमुख तुषार भोसले यांनी या घटनेवर टीका करत विरोधकांवर आरोप केले आहेत. तसेच माजी विश्वस्त ललिता शिंदे यांनी विश्वस्त निवड प्रक्रियेवरच प्रश्न उपस्थित करत आर्थिक व्यवहारातून पदे मिळाल्याचा गंभीर आरोप केला आहे.
या संपूर्ण प्रकरणामुळे केवळ दर्शन घोटाळाच नव्हे, तर देवस्थानच्या कारभारावर आणि विश्वस्त निवडीच्या प्रक्रियेवरही प्रश्नचिन्ह निर्माण झाले असून याची सखोल चौकशी करण्याची मागणी जोर धरत आहे.
