पाचगणी, ता.३० : मनोज जरांगे पाटील यांच्या आमरण उपोषणास पाठिंबा देण्यासाठी सकल मराठा समाज पांचगणी व पांचगणी परिसर मराठा क्रांती मोर्चाच्या वतीने उद्या (दि.३१) लाक्षणिक उपोषण करण्यात येणार आहे. तसेच दिवसभर शहरातील बाजारपेठ कडकडीत बंद ठेवण्यात येणार आहे.
पाचगणी व परिसरातील सकल मराठा समाज सोमवारी सायंकाळी साडेसहाच्या सुमारास पाचगणी (ता.महाबळेश्वर) येथील शासकीय विश्रामगृहात एकत्र येऊन झालेल्या बैठकीत उपोषण व पाचगणी बंदबाबत रुपरेषा ठरविण्यात आली. पाचगणी व परिसरातील सकल मराठा समाज उद्या सकाळी दहा वाजता छत्रपती शिवाजी महाराज चौकात एकत्र येणार असून, एक दिवसीय लाक्षणिक उपोषण होणार असून अत्यावश्यक सेवा वगळता दिवसभर सर्व व्यवहार बंद ठेवण्यात येणार आहेत.
मनोज जरांगे पाटील यांनी आमरण उपोषण पुकारले असून, राज्यात मराठा आरक्षणाचा मुद्दा पेटला आहे. आरक्षणाची मागणी तीव्र होत असून, गावागावांतून आंदोलनाला पाठिंबा मिळत आहे. मराठा आरक्षणासाठी राज्यभरात संतापाची लाट उसळली आहे. अनेक तरुण या आरक्षणासाठी आत्महत्या करत आहेत. याच पार्श्वभूमीवर पर्यटन नगरी पाचगणी शहरातील सर्व व्यवहार बंद राहणार असल्याने पर्यटकांची गैरसोय होण्याची शक्यता आहे.
