पंढरपूर : पंढरपूर तालुक्यात प्रेमप्रकरणातून एका ७० वर्षीय वृद्धाची हत्या झाल्याची धक्कादायक घटना समोर आली आहे. अंबादास खांडेकर यांची हत्या केल्यानंतर मृतदेह अर्धवट जाळण्यात आला होता. त्यामुळे मृतदेहाची ओळख पटविणे पोलिसांसमोर आव्हान होते. अखेर DNA चाचणीच्या अहवालातून तब्बल दीड महिन्यानंतर मृतदेहाची ओळख पटली. त्यानंतर पोलिसांनी तपासाला वेग देत अवघ्या १२ तासांत संशयित मंगल होनमाने हिला ताब्यात घेतले.
पोलिसांच्या तपासानुसार, अंबादास खांडेकर आणि मंगल होनमाने यांच्यात गेल्या काही वर्षांपासून प्रेमसंबंध होते. २७ जुलै रोजी दोघांमध्ये कोणत्यातरी कारणावरून वाद झाला. हा वाद वाढल्यानंतर मंगल हिने शेतात अंबादास यांच्यावर हल्ला करून त्यांची हत्या केल्याचा आरोप आहे. त्यानंतर पुरावा नष्ट करण्याच्या उद्देशाने मृतदेह अर्धवट जाळून ती घटनास्थळावरून निघून गेल्याचे तपासात समोर आले आहे.
२ ऑगस्ट रोजी परिसरातील एका शेतात अर्धवट जळालेल्या अवस्थेत अनोळखी मृतदेह आढळून आला होता. मृतदेहाची ओळख पटत नसल्याने पोलिसांनी विविध दिशांनी तपास सुरू केला. दरम्यान, अंबादास खांडेकर बेपत्ता असल्याची माहिती मिळाल्यानंतर पोलिसांनी त्यांच्या दोन मुलींचे DNA नमुने घेतले आणि ते तपासणीसाठी पाठविले.
तब्बल दीड महिन्यानंतर DNA अहवाल प्राप्त झाल्यानंतर शेतात आढळलेला मृतदेह अंबादास खांडेकर यांचाच असल्याचे स्पष्ट झाले. त्यानंतर पंढरपूर पोलिसांनी तपासाची चक्रे वेगाने फिरवली. तांत्रिक विश्लेषण आणि मिळालेल्या गोपनीय माहितीच्या आधारे पोलिसांनी मंगल होनमाने हिचा माग काढला आणि अवघ्या १२ तासांत तिला ताब्यात घेतले.
पोलिसांनी तिची चौकशी केली असता प्रेमसंबंधातून झालेल्या वादानंतर अंबादास यांची हत्या केल्याची कबुली दिल्याचे पोलिसांनी सांगितले. या घटनेमुळे पंढरपूर तालुक्यात खळबळ उडाली असून, प्रकरणाचा पुढील तपास पोलिसांकडून सुरू आहे.
