दौंड, ता. 29 : पुणे-सोलापूर महामार्गावर स्वामी चिंचोली (ता. दौंड) येथे दोन दुचाकींची जोरदार धडक होऊन पती-पत्नी जखमी झाल्याची घटना 22 सप्टेंबर रोजी सकाळी साडेनऊच्या सुमारास घडली. स्वामी चिंचोली पुलासमोरील पेट्रोल पंपाजवळ झालेल्या या अपघातात दुचाकीचेही नुकसान झाले असून, याप्रकरणी भिगवण येथील दुचाकीस्वाराविरुद्ध दौंड पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, भारत गोपीनाथ भोसले व त्यांच्या पत्नी मीरा भोसले हे एमएच 42 पी 4171 क्रमांकाच्या दुचाकीवरून पुणे-सोलापूर महामार्गावरून प्रवास करत होते. त्यावेळी कर्नाटक पासिंग असलेल्या केए 23 ईके 9487 क्रमांकाच्या बजाज प्लॅटिना दुचाकीवरील चालक लालाभाई वाघाभाई भरवाड (रा. भिगवण, ता. इंदापूर) याने त्यांच्या दुचाकीला जोरदार धडक दिली.
या अपघातात भारत भोसले व त्यांच्या पत्नी मीरा भोसले यांना किरकोळ तसेच गंभीर दुखापत झाली. तसेच त्यांच्या दुचाकीचे नुकसान झाले. अपघातास दुचाकीचालकाचा निष्काळजीपणा कारणीभूत असल्याची तक्रार दत्तात्रय गोपीनाथ भोसले (वय-50, रा. वरखंड, ता. दौंड) यांनी दौंड पोलिस ठाण्यात दिली आहे.
याप्रकरणी दौंड पोलिस ठाण्यात भारतीय न्याय संहितेच्या कलम १२५(अ), १२५(ब), २८१, ३२४(२) तसेच मोटार वाहन कायद्याच्या कलम १८४ अन्वये गुन्हा दाखल करण्यात आला आहे. पुढील तपास पोलिस नाईक पानसरे करीत आहेत.
