गोंदिया : गोंदिया जिल्ह्यातील तिरोडा तालुक्यात एक अत्यंत दुर्दैवी घटना घडली आहे. तिरोडा येथील पीएम श्री राणी अवंतीबाई प्राथमिक शाळेचा मुख्य गेट कोसळल्याने पाचवीत शिकणाऱ्या 11 वर्षांच्या विद्यार्थिनीचा मृत्यू झाला आहे.
मृत विद्यार्थिनीचे नाव निराली मनीष चाफले असे आहे. शनिवारी दुपारी सुमारे 1 वाजण्याच्या सुमारास शाळा सुटल्यानंतर ही घटना घडली. विद्यार्थी शाळेतून बाहेर पडत असताना अचानक मुख्य गेट कोसळला आणि निराली त्याखाली अडकली.
या अपघातात ती गंभीर जखमी झाली होती. तिला तातडीने तिरोड्यातील खासगी रुग्णालयात दाखल करण्यात आले. मात्र प्रकृती गंभीर असल्याने पुढील उपचारासाठी गोंदिया येथे नेत असताना वाटेतच तिचा मृत्यू झाला.
मिळालेल्या माहितीनुसार, शाळेचा मुख्य गेट अनेक वर्षांपासून जीर्ण अवस्थेत होता. तरीही याकडे प्रशासनाने दुर्लक्ष केल्याचा आरोप स्थानिकांकडून करण्यात येत आहे.
निराली ही अत्यंत हुशार आणि गुणी विद्यार्थिनी होती. तिने राज्यस्तरीय प्रज्ञाशोध स्पर्धेत चौथा क्रमांक मिळवला होता. काही दिवसांपूर्वीच पुण्यात तिचा सन्मान करण्यात आला होता.
या घटनेमुळे संपूर्ण परिसरात शोककळा पसरली आहे. विशेष म्हणजे निरालीची आई त्याच शाळेत मुख्याध्यापक म्हणून कार्यरत आहेत, त्यामुळे कुटुंबावर मोठा आघात झाला आहे.
दरम्यान, या घटनेनंतर स्थानिक नागरिकांनी तीव्र संताप व्यक्त केला असून दोषींवर कठोर कारवाई करण्याची मागणी केली जात आहे. तसेच, शाळांच्या इमारतींची आणि सुविधांची नियमित तपासणी करण्याची गरज पुन्हा एकदा समोर आली आहे.
