पुणे: पुणे जिल्ह्यातील इंदापूर तालुक्यात माणुसकीला काळिमा फासणारी घटना समोर आली आहे. जमिनीच्या वादातून दोन मुलांनी आपल्या वृद्ध आई-वडिलांना भररस्त्यात काठी आणि दांडक्याने मारहाण केल्याचा आरोप आहे. या घटनेचा व्हिडिओ सोशल मीडियावर मोठ्या प्रमाणात व्हायरल झाला असून, घटनेनंतर परिसरात संताप व्यक्त केला जात आहे. याप्रकरणी पोलिसांनी दोन्ही मुलांविरोधात गुन्हा दाखल केला आहे.
ही घटना इंदापूर तालुक्यातील तरंगवाडी येथे घडली. मिळालेल्या माहितीनुसार, आईच्या नावावर असलेली जमीन विकल्याच्या कारणावरून कुटुंबात वाद सुरू होता. याच वादातून दोन मुलांनी वडिलांशी भांडण केले. त्यानंतर हा वाद इतका वाढला की, मुलांनी आई-वडिलांना रस्त्यावर गाठून मारहाण केल्याचा आरोप आहे.
घटनेचा व्हिडिओ समोर आला असून, त्यामध्ये आई आणि वडील रस्त्यावर पडलेले दिसत आहेत. त्यांच्या जवळ एक पांढऱ्या रंगाची कार उभी असल्याचे दिसते. यावेळी एका मुलाच्या हातात काठी असून तो वडिलांना मारहाण करत असल्याचे व्हिडिओमध्ये दिसत आहे.
आपल्या पतीला मारहाण होत असल्याचे पाहून आईने मुलांना थांबवण्याचा प्रयत्न केला. ती हात जोडून मुलांना विनंती करत असल्याचेही व्हिडिओमध्ये दिसून येते. मात्र, तरीही मारहाण सुरूच राहिल्याचा आरोप आहे. या प्रकाराचा व्हिडिओ सोशल मीडियावर व्हायरल झाल्यानंतर नागरिकांकडून संताप व्यक्त करण्यात येत आहे.
घटनेनंतर वडिलांनी इंदापूर पोलीस ठाणे गाठून आपल्या मुलांविरोधात तक्रार दाखल केली. त्यांच्या तक्रारीवरून पोलिसांनी संजय तुकाराम राऊत आणि राजेंद्र तुकाराम राऊत यांच्याविरोधात गुन्हा दाखल केला आहे.
जमिनीच्या वादातून जन्मदात्या आई-वडिलांनाच मारहाण झाल्याने या घटनेची परिसरात चर्चा सुरू आहे. पोलिसांकडून प्रकरणाचा पुढील तपास केला जात असून, मारहाणीमागील नेमका वाद आणि घटनेची संपूर्ण परिस्थिती तपासली जात आहे.
