पुणे : पुण्यात गणेशोत्सवातील DJच्या मुद्द्यावरून वाद वाढत असताना नागपूर पोलिसांनी उत्सवाच्या पार्श्वभूमीवर महत्त्वाचा निर्णय घेतला आहे. नागपूरचे पोलीस आयुक्त विश्वास नांगरे पाटील यांनी शहरात DJ, साऊंड सिस्टीम आणि लेझर लाईटच्या वापरावर कठोर निर्बंध लागू केले आहेत.
नागपूर शहरात 4 सप्टेंबरपासून 1 नोव्हेंबरपर्यंत कोणत्याही सार्वजनिक किंवा खासगी कार्यक्रमात DJ वाजवता येणार नाही. DJची साऊंड सिस्टीम घेऊन जाणाऱ्या वाहनांवरही कारवाई केली जाणार आहे. याशिवाय बीम लाईट, डिम लाईट आणि लेझर लाईटच्या वापरालाही मनाई करण्यात आली आहे.
गणेशोत्सवासह या कालावधीत शहरात विविध धार्मिक आणि सांस्कृतिक कार्यक्रम होणार आहेत. गोकुळाष्टमी, दहिहंडी, पोळा, तान्हा पोळा, ताजुद्दीन बाबा छब्बीसवी, गणेशमूर्ती आगमन-विसर्जन मिरवणुका, धम्मचक्र प्रवर्तन दिन तसेच दुर्गादेवीच्या मूर्तींच्या मिरवणुका यांचा त्यात समावेश आहे.
मिरवणुका आणि कार्यक्रमांमध्ये मोठ्या आवाजात DJ तसेच लेझर आणि बीम लाईटचा वापर होतो. त्यामुळे नागरिकांच्या आरोग्यावर परिणाम होण्याची शक्यता असते. विशेषतः लेझर लाईट थेट डोळ्यांवर पडल्यास गंभीर इजा होऊ शकते. तसेच वाहनचालकांच्या डोळ्यांवर तीव्र प्रकाश पडल्याने वाहनावरील नियंत्रण सुटून अपघात होण्याचा धोका वाढतो.
ध्वनीप्रदूषणामुळे रुग्ण, ज्येष्ठ नागरिक, लहान मुले आणि सर्वसामान्य नागरिकांना त्रास होऊ शकतो. त्याचबरोबर मोठ्या आवाजामुळे गर्दीच्या ठिकाणी कायदा आणि सुव्यवस्थेचा प्रश्न निर्माण होण्याची शक्यता असते.
या सर्व बाबी लक्षात घेऊन नागपूर पोलिसांनी हा निर्णय घेतला आहे. आदेशाचे उल्लंघन करणाऱ्यांविरोधात थेट कायदेशीर कारवाई केली जाईल, असा इशारा पोलीस प्रशासनाने दिला आहे. त्यामुळे आगामी सणांच्या काळात शांतता आणि सुरक्षितता राखण्यास मदत होण्याची अपेक्षा आहे.
