नागपूर: महाराष्ट्राच्या सर्वांगीण विकासासाठी रस्त्यांचे जाळे मजबूत करण्यावर सरकारकडून भर दिला जात आहे. त्याच पार्श्वभूमीवर पूर्व विदर्भात आणखी तीन मोठे द्रुतगती महामार्ग उभारण्याचा मार्ग मोकळा झाला आहे. नागपूर-गोंदिया, नागपूर-चंद्रपूर आणि भंडारा-गडचिरोली द्रुतगती महामार्गांसह नवेगाव मोरे ते सुरजागड मार्गाच्या निधीला राज्य सरकारने प्रशासकीय मंजुरी दिली आहे. या प्रकल्पांसाठी तब्बल ४२ हजार कोटी रुपयांची तरतूद करण्यात आली असून, पूर्व विदर्भात सुमारे ४६० किलोमीटरचे नवे महामार्ग जाळे विकसित होणार आहे.
या महामार्गांमुळे नागपूरसह भंडारा, गोंदिया, गडचिरोली, चंद्रपूर आणि वर्धा या जिल्ह्यांना फायदा होण्याची अपेक्षा आहे. हे जिल्हे हाय-स्पीड कनेक्टिव्हिटीने जोडले जाणार असल्याने प्रवासाचा वेळ कमी होण्यास मदत होणार आहे. तसेच गडचिरोलीतील कोनसारी आणि सूरजागड यांसारख्या भागांमध्ये रस्ते पोहोचल्याने लोहखनिजासह इतर उद्योग आणि वाहतुकीला चालना मिळण्याची अपेक्षा आहे. हे मार्ग विदर्भातील प्रमुख केंद्रांना समृद्धी महामार्गाशी जोडण्याचे काम करणार असल्याने मुंबईशी संपर्कही वाढणार आहे.
नागपूर-गोंदिया द्रुतगती महामार्गाची लांबी १६२ किलोमीटर असेल. नागपूरमधील गवसी मानपूर ते गोंदियातील सावरीदरम्यान ३+३ लेनचा हा महामार्ग प्रस्तावित आहे. या मार्गावर नऊ इंटरचेंज असतील. त्यासाठी १,६३४ हेक्टर जमिनीचे भूसंपादन आवश्यक आहे. या महामार्गामुळे नागपूर, भंडारा आणि गोंदिया हे तीन जिल्हे जोडले जाणार आहेत.
नागपूर-चंद्रपूर द्रुतगती महामार्गाची लांबी २०४ किलोमीटर असेल. वर्धा जिल्ह्यातील सेलडोह ते चंद्रपूरमधील नवेगाव मोरे (घाटकुळ)दरम्यान हा महामार्ग उभारला जाणार आहे. २+२ लेनच्या या मार्गावर सात इंटरचेंज असतील. त्यासाठी २,१५९ हेक्टर जमिनीचे भूसंपादन आवश्यक असून, हा महामार्ग नागपूर आणि चंद्रपूरमधील नऊ तालुक्यांना जोडणार आहे.
भंडारा-गडचिरोली द्रुतगती महामार्ग ९४ किलोमीटर लांबीचा असेल. भंडारा जिल्ह्यातील बोरगाव ते चंद्रपूर जिल्ह्यातील ऋणमोजनदरम्यान ३+३ लेनचा हा महामार्ग बांधण्यात येणार आहे. या मार्गावर सहा इंटरचेंज असतील. यासाठी १,१८५ हेक्टर जमिनीचे भूसंपादन आवश्यक आहे. हा महामार्ग भंडारा, गोंदिया आणि गडचिरोली या जिल्ह्यांना जोडणार आहे.
दरम्यान, या मोठ्या प्रकल्पांच्या अंमलबजावणीसाठी स्वतंत्र विशेष उद्देश वाहन अर्थात ‘एसपीव्ही’ (Special Purpose Vehicle) स्थापन करण्यात आले आहेत.
