छत्रपती संभाजीनगर: लैंगिक अत्याचार आणि फसवणूक प्रकरणातील भोंदूबाबा अशोक खरात (Ashok Kharat) सध्या पोलिस कोठडीत असताना, त्याच्या संदर्भात राष्ट्रवादीचे आमदार रोहित पवार (Rohit Pawar) यांनी गंभीर संशय व्यक्त केला आहे. खरातला अनेक महत्त्वाच्या गोष्टी आणि काही नेत्यांची नावे माहिती असल्यामुळे त्याचा मृत्यू संशयास्पद पद्धतीने होऊ शकतो, असा दावा त्यांनी केला आहे. (Chhatrapati Sambhajinagae)
छत्रपती संभाजीनगर दौऱ्यावर असताना पत्रकार परिषदेत बोलताना रोहित पवार म्हणाले की, “खरातला खूप गोष्टी माहिती आहेत. 27, 28 आणि 29 जानेवारी हे तीन दिवस महत्त्वाचे होते. 28 जानेवारीला एका व्यक्तीचा अपघातात मृत्यू झाला. या काळात खरातच्या बँक खात्यात मोठी आर्थिक उलाढाल झाली. त्याच्यासोबत कोणते नेते येत होते आणि काय करत होते, हे त्याला माहिती आहे.”
ते पुढे म्हणाले, “या सर्व गोष्टी लक्षात घेता आम्हाला भीती वाटते की, उद्या त्याने आत्महत्या केली असे दाखवले जाईल किंवा एन्काऊंटरमध्ये त्याचा मृत्यू होऊ शकतो.”
रोहित पवार यांनी या प्रकरणात सखोल तपासाची गरज असल्याचे सांगितले. “खरात ज्या पद्धतीने काम करत होता, त्यावर कठोर कारवाई झाली पाहिजे. पण त्याच्यासोबत संबंधित असलेले लोक कोण होते, ते तिथे काय करत होते, याचाही तपास झाला पाहिजे,” असे त्यांनी स्पष्ट केले.
तसेच काही व्हिडिओ बाहेर आल्याचा उल्लेख करत, “काही अधिकाऱ्यांशी संबंधित व्हिडिओ समोर आले आहेत. मात्र काही गंभीर स्वरूपाचे व्हिडिओ अजूनही बाहेर आलेले नाहीत,” असेही त्यांनी सांगितले. या सर्व वक्तव्यांमुळे खरात प्रकरण पुन्हा चर्चेत आले असून, तपासात आणखी काय उघड होते याकडे सर्वांचे लक्ष लागले आहे.
