मुंबई: भारत सरकारने 10 एप्रिल रोजी अधिसूचना जारी करत आठव्या केंद्रीय वेतन आयोगात सल्लागार पदांसाठी अर्ज मागवले आहेत. इच्छुक उमेदवारांना 8th Central Pay Commission च्या अधिकृत संकेतस्थळावर जाऊन ऑनलाइन अर्ज करता येणार आहे.
हा आयोग विविध सरकारी कर्मचारी, अधिकारी आणि निवृत्तिवेतनधारकांच्या वेतनरचना आणि भत्त्यांबाबत शिफारसी करण्यासाठी स्थापन करण्यात आला आहे. या पदांसाठी उमेदवारांची नियुक्ती ठराविक कालावधीसाठी केली जाणार असून पूर्णवेळ किंवा अर्धवेळ कामाची संधी असेल.
या भरतीमध्ये एकूण 20 जागा आहेत. त्यामध्ये वरिष्ठ सल्लागार 5, सल्लागार 5 आणि यंग प्रोफेशनल 10 जागांचा समावेश आहे. अनुभव आणि वयोमर्यादा देखील निश्चित करण्यात आली आहे. वरिष्ठ सल्लागारासाठी 10 वर्षांपेक्षा जास्त अनुभव आणि 45 वर्षांपर्यंत वय, सल्लागारासाठी 6 वर्षांचा अनुभव आणि 40 वर्षांपर्यंत वय, तर यंग प्रोफेशनलसाठी 4 वर्षांचा अनुभव आणि 32 वर्षांपर्यंत वय आवश्यक आहे.
शैक्षणिक पात्रतेमध्ये वित्त, HR, IR यांसारख्या विषयात पदव्युत्तर पदवी किंवा MBA आवश्यक आहे. तसेच LLB केलेले आणि कायदेशीर कामाचा अनुभव असलेले उमेदवारही अर्ज करू शकतात. Excel आणि Presentation बनवण्याचे ज्ञान अनिवार्य ठेवण्यात आले आहे.
पगारही आकर्षक आहे. वरिष्ठ सल्लागारांना पूर्णवेळ 1,80,000 रुपये, सल्लागारांना 1,20,000 रुपये आणि यंग प्रोफेशनलला 90,000 रुपये पगार दिला जाणार आहे. मात्र याशिवाय इतर भत्ते मिळणार नाहीत.
नियुक्त उमेदवारांना वेतनरचना विश्लेषण, डेटा अभ्यास, कायदेशीर संशोधन आणि विविध मंत्रालयांशी समन्वय साधण्याची जबाबदारी दिली जाणार आहे.
ही भरती ‘ओपन-एंडेड’ असल्यामुळे जागा भरेपर्यंत अर्ज प्रक्रिया सुरू राहणार आहे. त्यामुळे इच्छुक उमेदवारांनी लवकरात लवकर अर्ज करण्याचे आवाहन करण्यात आले आहे.
