मुबंई : महाराष्ट्राच्या राजकारणात एकीकडे शेतकरी प्रश्नांवरून संघर्ष तीव्र होत असताना दुसरीकडे स्थानिक सहकार क्षेत्रात मनधरणीचे प्रयत्न सुरू आहेत. आगामी असणाऱ्या सोमेश्वर सहकारी साखर कारखान्याच्या पंचवार्षिक निवडणुकीवरून बारामतीमध्ये पुन्हा एकदा पवार घराण्यातील अंतर्गत राजकीय स्पर्धा समोर आली आहे.या पार्शवभूमिवर जेष्ठ नेते शरद पवार यांच्या मुंबईतील ‘सिल्व्हर ओक’ या निवासस्थानी एक उच्चस्तरीय बैठक बोलावण्यात आली होती.
सोमेश्वर सहकारी साखर कारखान्याच्या निवडणुकीत युगेंद्र पवार यांच्या नेतृत्वाखाली शरद पवार गट रिंगणात उतरण्याच्या तयारीत आहे, तर उपमुख्यमंत्री सुनेत्रा पवार यांच्या मार्गदर्शनाखाली अजित पवार गटाचे पॅनल सज्ज झाले आहे. याशिवाय भारतीय जनता पक्ष आणि शिवसेना (शिंदे गट) यांनीही स्वतंत्रपणे ही निवडणूक लढवण्याची तयारी दर्शवली आहे.मात्र कारखान्याची ही निवडणूक बिनविरोध व्हावी अशी स्पष्ट इच्छा शरद पवार यांनी व्यक्त केली आहे.
याच उद्देशाने मुंबईतील ‘सिल्व्हर ओक’ या त्यांच्या निवासस्थानी एक उच्चस्तरीय बैठक बोलावण्यात आली होती. या बैठकीस खासदार सुप्रिया सुळे यांच्यासह अजित पवार गटाचे युवा नेते पार्थ पवार, जय पवार आणि युगेंद्र पवार एकत्र उपस्थित होते. या चर्चेमुळे कारखान्याची निवडणूक बिनविरोध होणार की राजकीय संघर्ष कायम राहणार, याकडे सर्वांचे लक्ष लागले आहे.
राज्यातील वाढत्या दुष्काळी परिस्थितीकडे लक्ष वेधण्यासाठी राष्ट्रवादी काँग्रेस (शरदचंद्र पवार) पक्षाने आक्रमक पवित्रा घेतला आहे. या पार्श्वभूमीवर पक्षाचे सर्वेसर्वा शरद पवार यांच्या नेतृत्वाखाली पंढरपूर येथे एका भव्य मोर्चाचे आयोजन करण्यात आले आहे. अडचणीत सापडलेल्या बळीराजाला तातडीची मदत देण्याची बुद्धी राज्य सरकारला मिळावी, या प्रार्थनेसाठी पक्षाचे कार्यकर्ते श्री विठ्ठलाच्या चरणी साकडे घालणार आहेत.
या आंदोलनामुळे आगामी काळात राज्यातील राजकीय वातावरण अधिक तापण्याची चिन्हे आहेत. गुरुवारी या मोर्चाच्या पूर्वतयारीसाठी नेत्यांची एक महत्त्वाची बैठक पार पडली होती.
