डॉ. अशोक बालगुडे
पुणे, दि. २५ : गणेश विसर्जन मिरवणुकीच्या प्रचंड गर्दीत बेलबाग चौकात सुमारे ५० वर्षीय महिला अचानक बेशुद्ध पडली. त्याच ठिकाणी तैनात असलेल्या रुग्णवाहिकेने गर्दीतून मार्ग काढत अवघ्या चार मिनिटांत महिलेला ताराचंद रुग्णालयात दाखल केले. वेळेत उपचार मिळाल्याने महिलेची प्रकृती स्थिर झाली.
पुणे पोलीस विघ्नहर्ता न्यासाची रुग्णवाहिका बेलबाग चौकात तैनात होती. महिलेला चक्कर येऊन ती बेशुद्ध पडताच आजूबाजूच्या बाऊन्सरच्या मदतीने तिला रुग्णवाहिकेत दाखल करण्यात आले. रुग्णवाहिकेतही तिची प्रकृती खालावल्याने उपस्थित डॉक्टरांनी तातडीने उपचार सुरू केले.
बेलबाग चौक ते ताराचंद रुग्णालय हे सुमारे दोन किलोमीटरचे अंतर आहे. मिरवणुकीची गर्दी, मंडप आणि वाहतूक कोंडीमुळे रुग्णवाहिकेला मार्ग काढणे आव्हानात्मक होते. चालक अशोक दोरूगडे यांनी प्रसंगावधान राखत रुग्णवाहिका वेगाने पुढे नेली. काही ठिकाणी बॅरिकेड हटविण्यासाठी चालक आणि डॉक्टरांना स्वतः खाली उतरावे लागले.
रुग्णालयात महिलेवर तातडीने उपचार करण्यात आले. रक्तातील साखरेचे प्रमाण कमी झाल्याचे आढळले. तिला ओआरएस आणि आयव्ही देण्यात आले. ईसीजीसह आवश्यक तपासण्या करण्यात आल्या. हृदयविकाराच्या सौम्य धक्क्याची शक्यता व्यक्त झाली होती; मात्र तपासणीत तसे निदान झाले नसल्याची माहिती डॉ. शिवम सरोदे यांनी दिली. विसर्जन मिरवणुकीदरम्यान वैद्यकीय मदत तातडीने मिळावी यासाठी शहरातील प्रमुख मार्गांवर रुग्णवाहिका तैनात करण्यात आल्या आहेत.
