पुणे : मुंबई-बंगळुरू महामार्गावर वारजे आणि वाकड परिसरात होणाऱ्या वाहतूक कोंडीतून वाहनचालकांना मोठा दिलासा मिळाला आहे. भारतीय राष्ट्रीय महामार्ग प्राधिकरणाने (NHAI) वारजे येथे मुठा नदीवर आणि वाकड येथे मुळा नदीवर बांधलेले नवे पूल वाहतुकीसाठी खुले केले आहेत. या दोन्ही पुलांमुळे वाहतुकीला वेग मिळण्यास सुरुवात झाली असून, मुंबई ते पुणे प्रवासाचा वेळ सुमारे ३० ते ४० मिनिटांनी कमी होण्याची अपेक्षा आहे.
मुंबई-बंगळुरू महामार्गावर नवले पूल ते रावेत या दरम्यान गेल्या काही वर्षांपासून मोठ्या प्रमाणात वाहतूक कोंडी होत होती. महामार्गालगत पुणे आणि पिंपरी-चिंचवड शहरांचा विस्तार आणि वाढते नागरीकरण यामुळे महामार्गावरील लांब पल्ल्याच्या वाहतुकीसोबत स्थानिक वाहतुकीतही मोठी वाढ झाली. त्यामुळे विशेषतः वारजे आणि वाकड परिसरात सकाळी आणि सायंकाळी वाहनांच्या लांबच लांब रांगा लागत होत्या.
या कोंडीचा परिणाम कात्रज नवीन बोगदा आणि नवले पूल परिसरावरही होत होता. या ठिकाणी वाहनांच्या आठ ते दहा किलोमीटरपर्यंत रांगा लागल्याने वाहनचालकांचा मोठा वेळ कोंडीत जात होता.
वाहतूक कोंडी कमी करण्यासाठी NHAIकडून वारजे येथे मुठा नदीवर आणि वाकड येथे मुळा नदीवर दोन नवे पूल बांधण्यात आले. हे दोन्ही पूल तीनपदरी असून आता वाहतुकीसाठी खुले करण्यात आले आहेत. या पुलांमुळे वारजे, बाणेर, बालेवाडी, वाकड आणि भूमकर चौक परिसरातील वाहतूक कोंडी कमी होण्यास मदत होणार आहे.
वारजे येथील मुठा नदीवरील पूल ५०० मीटर लांब आणि ३० मीटर रुंद आहे. या पुलासाठी ५२.६८ कोटी रुपये खर्च झाला आहे. वाकड येथील मुळा नदीवरील पूल १७५ मीटर लांब आणि ३० मीटर रुंद असून, त्यासाठी ३१ कोटी रुपये खर्च झाला आहे. भूसंपादनासाठी अतिरिक्त २५ कोटी रुपये खर्च करण्यात आले आहेत.
या दोन्ही पुलांमुळे नागरिकांचा प्रवासाचा वेळ सुमारे १५ ते २० मिनिटांनी कमी होणार असल्याची माहिती NHAIचे प्रकल्प संचालक सचिन गौतम यांनी दिली.
