चंद्रपूर: विदर्भातील चंद्रपूर जिल्ह्यातील गोंडपिपरी तालुक्यात भाजपच्या एका पदाधिकाऱ्याविरोधात विनयभंगाचा गुन्हा दाखल झाल्याने खळबळ उडाली आहे. गोंडपिपरी तालुका भाजपचे महामंत्री भानेश येग्गेवार यांच्यावर १९ वर्षीय विवाहित महिलेचा विनयभंग करून तिच्यावर जबरदस्ती करण्याचा प्रयत्न केल्याचा आरोप आहे. गुन्हा दाखल झाल्यानंतर आरोपी फरार झाला असून पोलीस त्याचा शोध घेत आहेत.
पोलिसांनी दिलेल्या माहितीनुसार, २१ जून रोजी भंगाराम तळोधी येथे भानेश येग्गेवार यांच्या शेतात कापूस बियाण्यांची पेरणी सुरू होती. बियाणे संपल्याने तक्रारदार महिला आणि भानेश येग्गेवार हे बियाणे आणण्यासाठी गावातील साळूच्या घरी गेले होते.
तक्रारीनुसार, घरात कोणी नसल्याची संधी साधून आरोपीने महिलेचा विनयभंग केला. “तुला वर्षभरापासून मूलबाळ होत नाही. मी तुला मूल करून देतो,” असे म्हणत तिच्यावर जबरदस्ती करण्याचा प्रयत्न केल्याचा आरोप करण्यात आला आहे. महिलेने आरडाओरड केल्यानंतर आरोपीने तिला बदनामी करण्याची धमकी दिली आणि तेथून निघून गेला, असे तक्रारीत नमूद करण्यात आले आहे.
घटनेनंतर पीडित महिलेने पोलिसांकडे जाण्याचा निर्णय घेतला. मात्र तिला स्थानिक मराठी भाषा नीट अवगत नसल्यामुळे तक्रार दाखल करण्यास विलंब झाला. अखेर कुटुंबीय, सामाजिक कार्यकर्ते आणि नातेवाईकांच्या मदतीने २७ जून रोजी गोंडपिपरी पोलीस ठाण्यात तक्रार दाखल करण्यात आली.
तक्रारीनंतर पोलिसांनी भानेश येग्गेवार यांच्याविरोधात गुन्हा नोंदवला असून ते सध्या फरार आहेत. गोंडपिपरीचे पोलीस निरीक्षक रमेश हत्तीगोटे यांच्या मार्गदर्शनाखाली या प्रकरणाचा पुढील तपास सुरू आहे.
