वाशिम : वाशिम जिल्ह्यामधून एक धक्कादायक बातमी समोर आली आहे. एका 45 वर्षीय महिलेची हत्या करण्यात आली असून या घटनेनं खळबळ उडाली आहे. या महिलेवर बलात्कार करून नंतर तीची हत्या करण्यात आल्याची शक्यता वर्तवण्यात येत आहे. या महिलेचा मृतदेह गावाशेजारील जंगलामध्ये एका उंच टेकडीवर आढळून आला आहे. या प्रकरणी पोलिसांनी गुन्हा दाखल केला आहे. दोन संशयितांना चौकशीसाठी ताब्यात घेण्यात आलं असल्याची माहिती मिळत आहे. तसेच या प्रकरणाचा अधिक तपास सुरू असल्याची माहिती पोलिसांकडून देण्यात आली आहे.
मिळालेल्या माहितीनुसार, वाशिम जिल्ह्याच्या मालेगाव तालुक्यातील एका गावामध्ये 45 वर्षीय महिलेची हत्या करण्यात आल्याची धक्कादायक घटना समोर आली आहे. आपल्या माहेरी राहणारी ही महिला दोन दिवसांपूर्वी शेतात गेली होती. मात्र ती त्या दिवशी सायंकाळी घरी परतलीच नाही. तिच्या घरच्यांनी तिचा सर्वत्र शोध घेतला. त्यानंतर दोन दिवसांनी तिचा मृतदेह गावाशेजारील जंगलामध्ये एका उंच टेकडीवर आढळून आला. या घटनेनं परिसरात खळबळ उडाली आहे.
दरम्यान, या प्रकरणी मृत महिलेच्या भावाने पोलीस ठाण्यात तक्रार दाखल केली आहे. मृत महिलेवर बलात्कार करून नंतर तिची हत्या करण्यात आली असल्याचा संशय तिच्या भावानकडून तक्रारीमध्ये व्यक्त केला गेला आहे. या प्रकरणात पोलिसांनी गुन्हा दाखल केला आहे. दोन संशयितांना चौकशीसाठी ताब्यात घेण्यात आलं असून घटनेबाबत अधिक तपास सुरू असल्याची माहिती पोलिसांनी दिली आहे.
