यवतमाळ : यवतमाळ मधून मोठी बातमी समोर आली आहे. येथे आमदाराच्या कारवर कुऱ्हाडीने वार केल्याची घटना घडली आहे. झरी जामनी तालुक्यातील दुर्भा येथे ठेक्याने घेतलेल्या शेतात पेरणीवरून वाद झाला. यवादाचे रूपांतर मारहाणीत झाले. यावेळी माजी आमदार वामनराव कासावार यांची फॉर्च्युनर कार शेतात उभी असताना संशयित आरोपीने कुऱ्हाडीच्या सह्याने या फॉर्च्युनरची तोडफोड केली. यामध्ये कारचे सुमारे 2 लाख रुपयांचे नुकसान झाले आहे. अशी तक्रार पाटण पोलीस ठाण्यात दाखल करण्यात आली आहे. याप्रकरणी, आरोपींविरुद्ध गुन्हा दाखल करण्यात आला आहे.
मिळालेल्या माहितीनुसार, सचिन भिमराव पंचरे (वय 35, रा. दुर्भा ) यांनी जिल्हा परिषदेच्या शाळेची 14 एकर शेती 2025 ते 26 या वर्षासाठी वार्षिक 70,000 रुपये दराने ३ वर्षांसाठी ठेक्याने घेतली आहे. याबाबतची पंचरे यांच्याकडे अधिकृत पोचपावती देखील आहे. पेरणीसाठी ते आपल्या मालकाच्या MH29BP0505 या क्रमांकाच्या फॉर्च्युनरसह शेतात गेले होते. त्यावेळी गावातील पेंन्टना गोंटीमुकुलवार, त्यांची पत्नी लक्ष्मीबाई आणि मुलगा करण शेतात येऊन त्यांनी या शेतीवर आपला दावा सांगितला.
त्यानंतर हे शेत आमचे आहे असे म्हणत या शेतातील पेरणी थांबवण्याचा प्रयत्न केला. येथे तुम्ही येथे पेरणी करु नका असेही त्यांनी म्हटले. यावेळी, सचिन पंचरे यांनी जिल्हा परिषद शाळेच्या ठेक्याची माहिती संबंधितांना दिली. परंतु वाद होऊन पेंन्टना यांनी हातातील कुऱ्हाडीने शेतात आलेलय माजी आमदाराचे वाहन फोडले.
दरम्यान, आरोपींनी शिवीगाळ करत जीवे मारण्याची धमकी दिल्याचा आरोप पंचरे यांनी केला आहे. तसेच फॉर्च्युनर वाहनांची तोडफोड करणाऱ्याविरुद्ध पाटण पोलीस ठाण्यात फिर्याद दिली असून गुन्हा दाखल करण्यात आला आहे. पुढील तपास पोलीस करीत आहेत.
