दिल्ली: देशातील सर्वात मोठी सरकारी बँक असलेल्या स्टेट बँक ऑफ इंडिया (SBI) च्या ग्राहकांसाठी महत्त्वाची सूचना जारी करण्यात आली आहे. तांत्रिक देखभालीच्या कामामुळे गुरुवारी, १९ नोव्हेंबर २०२६ रोजी बँकेची UPI सेवा सुमारे ४५ मिनिटांसाठी तात्पुरती बंद राहणार आहे. बँकेने आपल्या अधिकृत सोशल मीडिया अकाऊंटवरून याबाबत माहिती दिली आहे. या कालावधीत नियमित UPI ॲप्सच्या माध्यमातून आर्थिक व्यवहार करता येणार नाहीत.

बँकेने दिलेल्या माहितीनुसार, १९ नोव्हेंबर रोजी दुपारी १.१५ ते २ वाजेपर्यंत SBI ची UPI सेवा उपलब्ध नसणार आहे. तांत्रिक देखभालीचे काम निर्धारित वेळेपूर्वी पूर्ण होण्याची शक्यताही बँकेने व्यक्त केली आहे.
या काळात ग्राहकांची गैरसोय होऊ नये, यासाठी बँकेने पर्यायी व्यवस्था म्हणून UPI Lite सुविधेचा वापर करण्याचा सल्ला दिला आहे. या तात्पुरत्या व्यत्ययाबद्दल बँकेने ग्राहकांची दिलगिरीही व्यक्त केली आहे.

UPI Lite च्या माध्यमातून ग्राहकांना UPI पिन न टाकता कमी रकमेचे व्यवहार करता येतात. रिझर्व्ह बँकेच्या (RBI) नियमांनुसार, UPI Lite द्वारे एका व्यवहारासाठी कमाल १,००० रुपये खर्च करता येतात. तसेच या वॉलेटमध्ये एकावेळी जास्तीत जास्त ५,००० रुपये ठेवता येतात.
दुपारी २ वाजल्यानंतर SBI ची नियमित UPI सेवा पुन्हा पूर्ववत सुरू होणार आहे. त्यामुळे ग्राहकांनी या वेळेत महत्त्वाचे डिजिटल व्यवहार करण्याचे नियोजन टाळावे किंवा पर्यायी सुविधेचा वापर करावा, असे आवाहन करण्यात आले आहे.






