Nagpur News: नागपूर : नागपूर जिल्ह्यात रविवारी सकाळी एका स्फोटकांच्या कारखान्यात मोठा स्फोट (Explosion in the factory) झाला. या दुर्घटनेत किमान 17 जणांचा मृत्यू झाला असून 18 जण जखमी झाल्याची माहिती पोलिसांनी दिली. ही घटना काटोल तालुक्यातील रौलगाव येथे घडली.
मिळालेल्या माहितीनुसार, एसबीएल एनर्जी लिमिटेड (SBL Energy Limited) या कंपनीच्या कारखान्यात सकाळी सुमारे 7 ते 7.15 वाजण्याच्या दरम्यान स्फोट झाला. कंपनीच्या डेटोनेटर पॅकिंग विभागात हा प्रकार घडल्याचे सांगण्यात आले आहे. स्फोट इतका जोरदार होता की परिसरात भीतीचे वातावरण निर्माण झाले.
स्फोटानंतर तात्काळ बचावकार्य सुरू करण्यात आले. जखमींना त्वरित नागपूर येथील विविध रुग्णालयात उपचारासाठी हलवण्यात आले. काही जखमींची प्रकृती गंभीर असल्याचे समजते. घटनेची माहिती मिळताच जिल्हाधिकारी विपिन इटनकर आणि पोलिस अधीक्षक हर्ष पोदार यांनी घटनास्थळी भेट दिली आणि परिस्थितीचा आढावा घेतला.
कंपनीकडून लवकरच अधिकृत निवेदन जारी करण्यात येणार असल्याचे सांगण्यात आले आहे. स्फोटाचे नेमके कारण अद्याप स्पष्ट झाले नसून पोलिस आणि संबंधित यंत्रणा तपास करत आहेत. सुरक्षा नियमांचे पालन झाले होते का याचीही चौकशी केली जाणार आहे.
