इंदापूर, आदित्य बोराटे –
Indapur : रब्बी हंगामातील नव्या ज्वारीची आवक सुरू होताच इंदापूर कृषी उत्पन्न बाजार समितीत उत्साहवर्धक व्यवहार नोंदवले गेले. गुरुवारी (दि. २६) मुख्य बाजार, इंदापूर येथील भुसार मार्केटमध्ये झालेल्या खुल्या लिलावात ज्वारीला प्रति क्विंटल ६,००१ रुपयांचा उच्चांकी दर मिळाला. जयसिंग पाटील यांच्या आडतीवर झालेल्या या व्यवहारामुळे हंगामाची सुरुवात समाधानकारक ठरली आहे. त्याच दिवशी गहू व हरभरा या शेतमालाचीही आवक सुरू झाली.
इंदापूर बाजार समितीच्या मुख्य बाजारासोबत भिगवण, निमगाव-केतकी व वालचंदनगर या उपबाजारांमध्ये भुसार, डाळींब, कांदा, मासळी, पेरू, सीताफळ, ड्रॅगन फ्रूट व फुले यांसारख्या विविध शेतमालाची मोठ्या प्रमाणावर उलाढाल होत असते. खुली लिलाव पद्धत, अचूक वजनमाप, पारदर्शक हिशोबपट्टी आणि विक्रीनंतर त्वरित रक्कम अदा करण्याची पद्धत यामुळे शेतकऱ्यांचा बाजार समितीवरील विश्वास अधिक दृढ झाला आहे.
शेतमालाची गुणवत्ता सुधारण्यासाठी अकलूज रोडलगतच्या बाजार आवारात प्रति तास ५ मेट्रिक टन क्षमतेचे धान्य सफाई यंत्र उभारण्यात आले आहे. तसेच शेतमाल तारण योजना कार्यान्वित असून शेतकऱ्यांना आर्थिक सुलभता मिळत आहे. मुख्य बाजार, इंदापूर तसेच शिवलिलानगर, भिगवण, राशीन रोड, निमगाव-केतकी व वालचंदनगर येथे उच्च क्षमतेचे भुईकाटा उपलब्ध असून २४ तास सेवा दिली जाते.
दरम्यान, मक्याच्या दरात घट झाल्याने बाजार समितीने हमीभाव दराने खरेदी केंद्र सुरू केले आहे. या निर्णयाबाबत शेतकऱ्यांनी समाधान व्यक्त केले आहे. बाजार समितीच्या विविध योजना व उपक्रमांचा लाभ घ्यावा, असे आवाहन सभापती तुषार जाधव, उपसभापती मनोहर ढुके आणि माजी सभापती आप्पासाहेब जगदाळे यांनी केले. संचालक व पदाधिकारी यावेळी उपस्थित होते.
