पुणे : राजधानी दिल्लीतील जतंरमंतरवरील आंदोलनाच्या यशानंतर कॉकरोच जनता पार्टीने विविध मुद्यावरून आंदोलन छेडले आहे.मात्र आता आसाममधील गुवाहाटी येथे ‘सिटीझन्स फॉर जस्टिस अँड पीस’ (CJP) या संघटनेचे सह -संयोजक आशुतोष रांका यांच्यासह अनेक नेते आणि कार्यकर्त्यांना ताब्यात घेतल्याची माहिती समोर आली आहे. या कारवाईनंतर संघटनेचे संस्थापक अभिजित दीपके यांनी प्रशासनावर तीव्र शब्दांत निशाणा साधला आहे.
मिळालेल्या माहितीनुसार, गुवाहाटी येथे आयोजित केलेली CJP ची पहिली प्रादेशिक स्वयंसेवक सभा सुरू होण्याआधीच पोलिसांनी उधळून लावली. या घटनेदरम्यान पोलिसांनी CJP चे सह-संयोजक आशुतोष रांका यांच्यासह अनेक कार्यकर्ते व नेत्यांना ताब्यात घेतले. यावरून अभिजित दीपके यांनी सोशल मीडिया प्लॅटफॉर्म ‘X’ वर पोस्ट करत आरोप केला की, पोलीस पथकाने आशुतोष रांका आणि त्यांच्या सहकाऱ्यांना एका गुप्त ठिकाणी हलवले आहे. या बैठकीसाठी आलेल्या कार्यकर्त्यांना रोखण्यासाठी पोलिसांनी सभेच्या ठिकाणी जाणारे सर्व रस्ते बंद केले होते. एवढेच नाही तर घटनास्थळी अश्रुधुराचे साहित्य तैनात करण्यात आले होते आणि पकडलेल्या कार्यकर्त्यांना भेटण्यापासून वकिलांनाही रोखण्यात आले.
शनिवारपासून आसाम दौऱ्यावर असलेले आशुतोष रांका या बैठकीत मार्गदर्शन करणार होते. या दौऱ्यादरम्यान CJP ची टीम मतदार यादी पुनर्रचना प्रक्रियेमुळे अडचणीत आलेल्या कुटुंबांना भेटणार होती. तसेच स्थानिक शासकीय शाळांची पाहणी करून जमिनीशी संबंधित प्रश्नांवर अभ्यास करणार होती. रांका यांनी असा आरोप केला आहे की, मतदार यादीतील फेरफार आणि इतर प्रशासकीय त्रुटी उघड होऊ नयेत, म्हणूनच राज्य प्रशासन त्यांच्या कामात अडथळे आणत आहे.
या पोलीस कारवाईनंतरही CJP ने आसामसह संपूर्ण ईशान्य भारतात आपले नेटवर्क विस्तारण्याचा आणि तळागाळातील लोकांचे प्रश्न मांडण्याचा निर्धार व्यक्त केला आहे. सध्या ताब्यात घेतलेल्या सर्व सदस्यांची तात्काळ मुक्तता करण्याची मागणी संघटनेकडून केली जात आहे, मात्र किती लोकांना आणि कुठे ठेवले आहे याबाबत अद्याप कोणतीही अधिकृत माहिती मिळालेली नाही.
