पिंपरी-चिंचवड : दोन दिवसांपासून बेपत्ता असलेल्या पिंपरी-चिंचवड पोलीस दलातील कर्मचारी विजय कोळी यांचा मृतदेह निगडीतील ट्रान्सपोर्ट नगर परिसरात आढळून आला. प्राथमिक माहितीनुसार, त्यांनी स्वतःचे जीवन संपवल्याचे समोर आले आहे. या घटनेनंतर पोलीस दलात हळहळ व्यक्त केली जात आहे.
विजय कोळी हे वरिष्ठ अधिकाऱ्यांकडे आरटीपीसी म्हणून कार्यरत होते. दोन दिवसांपूर्वी कौटुंबिक कारणावरून घरात वाद झाल्यानंतर ते घराबाहेर पडले होते. त्यांच्यासोबत सरकारी पिस्तूल असल्याचे लक्षात आल्यानंतर पोलिसांनी त्यांचा शोध सुरू केला होता.
कोळी हे निगडीतील दुर्गादेवी टेकडी परिसरात शेवटचे दिसल्याची माहिती तपास पथकाला मिळाली होती. त्यानंतर या भागात पोलिसांकडून मोठ्या प्रमाणावर शोधमोहीम राबवण्यात आली. परिसर विस्तीर्ण असल्याने शोधासाठी ड्रोनचीही मदत घेण्यात आली. मात्र, सलग दोन दिवस शोध सुरू असतानाही त्यांचा ठावठिकाणा लागला नव्हता.
शनिवारी सकाळी निगडी ट्रान्सपोर्ट नगर येथील बस डेपो परिसरात त्यांचा मृतदेह आढळला. घटनास्थळी सरकारी पिस्तूलही आढळल्याची माहिती आहे. पोलिसांनी तत्काळ घटनास्थळी जाऊन पंचनामा केला. मृतदेह शवविच्छेदनासाठी पाठवण्यात आला असून, या प्रकरणाचा पुढील तपास सुरू आहे.
प्राथमिक माहितीनुसार कौटुंबिक वादाचा संदर्भ समोर येत असला तरी विजय कोळी यांच्या मृत्यूमागील नेमके कारण अद्याप स्पष्ट झालेले नाही. तपास पूर्ण झाल्यानंतरच याबाबत अधिक माहिती समोर येणार आहे.
