वाघोली : वाघोली परिसरात अवैध धंदे आणि अंमली पदार्थ सेवन करणाऱ्यांविरोधात पोलिसांनी कारवाई केली आहे . दोन स्वतंत्र कारवायांमध्ये गांजा सेवन करत असल्याच्या संशयावरून चार जणांना पकडण्यात आले. याप्रकरणी वाघोली पोलीस ठाण्यात एनडीपीएस कायद्यानुसार गुन्हे दाखल करण्यात आले आहेत.
पोलिसांनी दिलेल्या माहितीनुसार, 20 ऑक्टोबर रोजी सायंकाळी तपास पथकाचे पोलीस कर्मचारी वाघोली परिसरात गस्त घालत असताना बाजारतळ येथील स्मशानभूमीच्या भिंतीलगत, आव्हाळवाडी रोड येथे तीन जण चिलीममधून काहीतरी ओढताना दिसले. पोलिसांना पाहून पळून जाण्याचा प्रयत्न करणाऱ्या या तिघांना पोलिसांनी पकडले. अरविंदकुमार विनोद महतो (वय-28), गनारे कंतु राम (वय-40) आणि धिरजकुमार फेकन शहा (वय -22 ), अशी त्यांची नावे आहेत.
पंचांसमक्ष केलेल्या तपासणीदरम्यान अरविंदकुमार महतो याच्याकडे गांजा सेवनासाठी वापरलेले अर्धवट जळालेले सिगारेटचे तुकडे आणि कागदात गुंडाळलेला गांजासदृश पदार्थ मिळाल्याचे फिर्यादीत नमूद आहे. पोलिसांनी हा मुद्देमाल जप्त करून तिघांची वैद्यकीय तपासणी केली.
दुसऱ्या कारवाईत, 22 ऑक्टोबर रोजी सकाळी भावडी रोडवरील हनुमान मंदिराच्या मागे एक तरुण सिगारेट ओढताना पोलिसांना दिसला. पोलिसांनी त्याला पकडून चौकशी केली असता त्याने सिगारेटमध्ये गांजा भरून सेवन करत असल्याचे सांगितल्याचे फिर्यादीत नमूद आहे. जगदीश कैलास चव्हाण (वय 19, रा. कपुर व्हिलजवळ, भावडी रोड, वाघोली), असे या तरुणाचे नाव आहे. त्याच्याकडून गांजा सेवनासाठी वापरलेले साहित्य जप्त करण्याची कारवाई करण्यात आली.
