खडकवासला, (पुणे) : खडकवासला धरण चौपाटी परिसरात बीएमडब्ल्यू कार आणि रॉयल एनफिल्ड बुलेट यांच्यात झालेल्या अपघातात जखमी झालेल्या तरुणाला तात्काळ उपचार मिळण्यास मदत झाली. पुणे जिल्हा सुरक्षा रक्षक मंडळाचे सुरक्षा रक्षक हरिदास कुंडलिकराव वऱ्हाड यांनी सहकाऱ्यांसह तत्परतेने घटनास्थळी धाव घेतली. प्रसंगावधान राखत त्यांनी जखमी तरुणाला रुग्णालयात दाखल करण्यासाठी मदत केली. त्यांच्या या माणुसकीपूर्ण कार्याचे परिसरातून कौतुक होत आहे.
ही घटना खडकवासला धरण चौपाटी परिसरात रविवारी (ता. 25) दुपारी तीनच्या सुमारास घडली. बीएमडब्ल्यू कारच्या धडकेत पलाश बोन्द्रे (वय-26) हा तरुण जखमी झाला. अपघाताची माहिती मिळताच हरिदास वऱ्हाड यांच्यासह राजू उंडे, योगेंद्र जाधव आणि गणेश दळवी यांनी मदतकार्य सुरू केले. त्यांनी जखमी तरुणाला सुरक्षित ठिकाणी हलविण्यासह पोलिसांशी संपर्क साधणे आणि उपचारांसाठी रुग्णालयात पोहोचविण्यासाठी सहकार्य केले. पलाश याला प्रथम संजीवनी रुग्णालयात दाखल करण्यात आले. त्यानंतर पुढील उपचारांसाठी ससून रुग्णालयात हलविण्यात आले.
हरिदास वऱ्हाड हे सुरक्षा रक्षक म्हणून कर्तव्य बजावत असतानाच सामाजिक बांधिलकीही जपत आहेत. संकटात सापडलेल्या नागरिकांना मदत करण्यासाठी ते नेहमी पुढाकार घेतात. खोल पाण्यात आत्महत्येच्या उद्देशाने उतरलेल्या व्यक्तींना सुरक्षित बाहेर काढणे, त्यांचे समुपदेशन करून जीवनाकडे सकारात्मक दृष्टिकोनातून पाहण्यास प्रवृत्त करणे, तसेच रात्री-अपरात्री गरजू युवतींना सुरक्षितपणे घरी पोहोचविण्यास मदत करणे, अशा विविध कामांतून त्यांनी माणुसकी जपली आहे.
हरिदास वऱ्हाड हे हवेली आपत्ती व्यवस्थापन विभागाच्या रेस्क्यू टीमचे सदस्य आहेत. आपत्कालीन परिस्थितीत ते अग्निशामक दल आणि पोलीस प्रशासनाला मदत व सहकार्य करतात. स्वतःचा वेळ आणि श्रम खर्च करून नागरिकांच्या मदतीसाठी पुढे येणे, हे त्यांच्या कार्याचे वैशिष्ट्य आहे. या मदतकार्यात त्यांच्या सहकारी सुरक्षा रक्षकांचाही महत्त्वपूर्ण सहभाग असतो. कर्तव्य बजावताना सामाजिक जबाबदारीची जाणीव ठेवून संकटग्रस्तांना मदतीचा हात देणारे हरिदास वऱ्हाड आणि त्यांचे सहकारी यांचे कार्य प्रेरणादायी ठरत आहे.
