पुणे : गेल्या काही दिवसांपासून ‘कॉकरोच जनता पार्टी’ आणि त्यांचे संस्थापक अभिजीत दीपके हे विशेष चर्चेत आले आहेत. केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीसाठी दिल्लीतील जंतर-मंतर मैदानावर यशस्वी आंदोलन केल्यानंतर, पक्षाने ‘स्कूल ठीक करो’ मोहीम राबवून सरकारी शाळांच्या दुरावस्थेकडे लक्ष वेधले. या संपूर्ण राजकीय हालचालींमागे आणि आंदोलनाच्या नियोजनामागे नेमका कोणाचा हात आहे, असा प्रश्न उपस्थित केला जात आहे.
पक्षाचे सहसंयोजक आशुतोष रांका यांनी यामागची महत्त्वाची माहिती उघड केली आहे. महाराष्ट्रातील अजिंक्य शिंदे हे अभिजीत दीपके यांचे मुख्य मार्गदर्शक असून ते संपूर्ण रणनीती आखत आहेत. या माहितीला दीपके यांनी एका व्हिडिओ कॉल दरम्यान दुजोरा दिला आहे.NEET पेपर फुटीच्या मुद्द्यावर झालेल्या आंदोलनात शिंदेंचा वाटा अत्यंत महत्त्वाचा होता. त्यांनी आंदोलकांची राहण्याची सोय, स्वयंसेवकांचे जाळे निर्माण करणे आणि गर्दीचे नियोजन अत्यंत कौशल्याने सांभाळले होते. सुरुवातीला काही मोजक्या सहकाऱ्यांपर्यंत मर्यादित असलेल्या या चळवळीचे रुपांतर देशभरातील स्वयंसेवकांच्या मोठ्या नेटवर्कमध्ये करण्यात शिंदे यांनी यश मिळवले.
अजिंक्य शिंदे हे पूर्वी आम आदमी पक्षाशी जोडलेले होते आणि दीपके यांच्याशी त्यांची जुनी ओळख आहे. पक्ष स्थापने आधीपासूनच ते दीपके यांना मार्गदर्शन करत आहेत. त्यांच्या याच अनुभवाचा आणि संघटन कौशल्याचा विचार करून ऑगस्ट 2026 मध्ये सीजेपीच्या राष्ट्रीय कार्यकारिणीत त्यांची ‘National Organisation In-Charge’ म्हणून नियुक्ती करण्यात आली. आता निवडणूक आयोगाविरोधात होणाऱ्या नव्या आंदोलनाची आणि संघटनात्मक विस्ताराची संपूर्ण जबाबदारी पुन्हा एकदा अजिंक्य शिंदे यांच्यावरच असणार आहे.
आता पक्षाने आपली मोर्चाची दिशा थेट भारतीय निवडणूक आयोगाकडे वळवली आहे. निवडणूक आयुक्त ज्ञानेश कुमार यांनी पदाचा राजीनामा न दिल्यास दिल्लीत पुन्हा मोठे आंदोलन उभारण्याचा इशारा दीपके यांनी दिला आहे.
