पुणे: राज्यात लाचलुचपत प्रतिबंधक विभागाकडून विविध प्रकरणांत कारवाया सुरू असतानाच महाराष्ट्र प्रदूषण नियंत्रण मंडळातील सहा अधिकाऱ्यांवर निलंबनाची कारवाई करण्यात आली आहे. उद्योगांना उभारणीसाठी संमती (CTE) आणि संचालनासाठी संमती (CTO) देण्याच्या प्रक्रियेत कथित आर्थिक देवाणघेवाण झाल्याच्या आरोपांमुळे ही कारवाई करण्यात आली. पुण्यातील मंडळाच्या कार्यालयाशी संबंधित या प्रकरणामुळे प्रशासकीय वर्तुळात खळबळ उडाली आहे.
निलंबित करण्यात आलेल्या अधिकाऱ्यांमध्ये प्रादेशिक अधिकारी बाबासाहेब कुकडे, उपप्रादेशिक अधिकारी नवनाथ अवताडे, उपप्रादेशिक अधिकारी कार्तिकेय लंगोटे, क्षेत्रीय अधिकारी सुषमा कुंभार, क्षेत्रीय अधिकारी जयंत डोके आणि क्षेत्रीय अधिकारी अजय खामकर यांचा समावेश आहे. उद्योगांना आवश्यक परवानग्या देताना आर्थिक व्यवहार झाल्याच्या तक्रारी समोर आल्यानंतर संबंधित प्रकरणाची चौकशी करण्यात आली.
मिळालेल्या माहितीनुसार, या तक्रारींसोबत कथित आर्थिक व्यवहारांचे व्हिडिओ पुरावेही सादर करण्यात आले होते. त्यानंतर संबंधित अधिकाऱ्यांना कारणे दाखवा नोटिसा बजावून त्यांच्याकडून खुलासे मागवण्यात आले. मात्र, हे खुलासे समाधानकारक नसल्याचे नमूद करत सक्षम प्राधिकाऱ्यांनी ते अमान्य केले. कर्तव्यात कसूर आणि गैरवर्तन केल्याचा ठपका ठेवून विभागीय चौकशी सुरू असतानाच या सहाही अधिकाऱ्यांना निलंबित करण्याचे आदेश देण्यात आले आहेत.
निलंबनाच्या कालावधीत या अधिकाऱ्यांचे मुख्यालय मुंबई येथील महाराष्ट्र प्रदूषण नियंत्रण मंडळाच्या मुख्य कार्यालयात निश्चित करण्यात आले आहे. तसेच, नियंत्रण अधिकाऱ्यांची पूर्वपरवानगी घेतल्याशिवाय त्यांना मुख्यालय सोडता येणार नसल्याचे आदेशात स्पष्ट करण्यात आले आहे.
उद्योगांना पर्यावरणविषयक परवानग्या देण्याची प्रक्रिया पारदर्शक आणि नियमांनुसार होणे अपेक्षित असते. त्यामुळे या प्रकरणातील आरोप आणि त्यासंदर्भात सादर करण्यात आलेल्या पुराव्यांची विभागीय चौकशीत तपासणी होणार आहे. संबंधित अधिकाऱ्यांवरील निलंबनाची कारवाई ही चौकशीदरम्यानची प्रशासकीय कारवाई असून, आरोपांबाबतचा अंतिम निष्कर्ष चौकशी पूर्ण झाल्यानंतर स्पष्ट होईल.
