पुणे : पुण्यातील एमपीएससी परीक्षांच्या संदर्भातील विद्यार्थ्यांचे आंदोलन सलग 10 व्या दिवशीही कायम असून या विषयावर अद्याप कोणताही तोडगा निघालेला नाही. दरम्यान, या आंदोलनावरून महाराष्ट्रातील राजकीय वातावरणात जोरदार आरोप-प्रत्यारोप सुरू झाले आहेत. सत्ताधारी नेत्यांनी हे आंदोलन विद्यार्थ्यांचे नसून राजकीय फायद्यासाठी वापरले जात असल्याचा दावा केला आहे.
भाजप आमदार गोपीचंद पडळकर यांनी बोलताना राष्ट्रवादी काँग्रेसचे (शरदचंद्र पवार गट) आमदार रोहित पवार यांच्यावर कडक शब्दांत टीका केली.
पडळकर म्हणाले कि, रोहित पवार यांनी या आंदोलनाचा तमाशा केला असून ते विद्यार्थ्यांची माथी भडकवण्याचे काम करत आहेत..त्यांचं डोकं मेंढराच्या डागणीने डांगल पाहिजे अशी टीका त्यांनी केली.तसेच, खासदार संजय राऊत यांच्या केंद्र सरकार कोसळण्याच्या दाव्यावर भाष्य करताना, राऊत यांनी आधी स्वतःच्या राज्यसभा निवडणुकीची काळजी करावी, असा टोला पडळकरांनी लगावला.
दुसरीकडे, मंत्री नितेश राणे यांनीदेखील रोहित पवार यांच्यावर निशाणा साधला. जर रोहित पवार खरोखरच विद्यार्थ्यांच्या हक्कांसाठी लढत असतील, तर शरद पवार किंवा राहुल गांधी या आंदोलनाला पाठिंबा देण्यासाठी का आले नाहीत, असा सवाल राणे यांनी उपस्थित केला. हे आंदोलन विद्यार्थ्यांचे न राहता त्याला पूर्णपणे राजकीय वळण मिळाले असल्याचे ते म्हणाले.
याच मुद्द्यावरून ॲडव्होकेट गुणरत्न सदावर्ते यांनीही रोहित पवारांवर टीका केली. आंदोलनादरम्यान विद्यार्थ्यांवर गुन्हे दाखल झाले असताना, एफआयआर मध्ये रोहित पवारांचे नाव का नाही, असा प्रश्न सदावर्ते यांनी विचारला. विद्यार्थ्यांच्या आडून स्वतःचे राजकारण साधण्याचा प्रयत्न केला जात असल्याचा दावाही त्यांनी केला.
एकंदरीत, MPSC विद्यार्थ्यांच्या मागण्यांवर अद्याप मार्ग निघालेला नसला तरी या आंदोलनावरून राज्यातील राजकीय वातावरण चांगलेच तापले आहे.
