पुणे: पुणे शहरात वाहनांच्या नंबर प्लेटवर वेगवेगळ्या पद्धतीने नावे आणि आकर्षक अक्षरे लिहिण्याचे प्रकार वाढत असल्याने प्रादेशिक परिवहन कार्यालयाने (आरटीओ) अशा वाहनचालकांविरोधात कठोर कारवाई करण्याचा इशारा दिला आहे. वाहनांच्या नंबर प्लेटवर ‘दादा’, ‘भाऊ’, ‘शेठ’ किंवा आवडत्या व्यक्तीचे नाव लिहिणे, तसेच नोंदणी क्रमांकातील अंक आणि अक्षरांच्या आकारात मनमानी बदल करणे नियमबाह्य आहे. अशा प्रकारांवर कारवाई केली जाणार असल्याचे आरटीओकडून स्पष्ट करण्यात आले आहे.
पुण्यात दुचाकी आणि चारचाकी वाहनांवर वेगवेगळे फॉन्ट, आकर्षक अक्षरे आणि हटके डिझाइन असलेल्या नंबर प्लेट वापरण्याचे प्रमाण वाढले आहे. वाहनाला वेगळी ओळख मिळावी, यासाठी काही वाहनचालक नोंदणी क्रमांकाच्या स्वरूपात बदल करतात. काही जण नंबर प्लेटवर अतिरिक्त मजकूरही लिहितात. मात्र, वाहनाचा नोंदणी क्रमांक शासनाने निश्चित केलेल्या नियमांनुसार स्पष्ट आणि सहज वाचता येईल अशा स्वरूपात असणे आवश्यक आहे.
नंबर प्लेटवरील नियमबाह्य बदलांमुळे वाहतूक नियंत्रणातही अडचणी निर्माण होऊ शकतात. सीसीटीव्ही कॅमेरे, वाहतूक पोलिसांची देखरेख यंत्रणा आणि ई-चलन प्रणालीच्या माध्यमातून वाहनांची ओळख पटवली जाते. अशा वेळी अंकांची मोडतोड, वेगवेगळ्या आकारातील अक्षरे आणि अनधिकृत मजकूर यामुळे नोंदणी क्रमांक वाचणे कठीण होऊ शकते. परिणामी, वाहतूक नियमांचे उल्लंघन करणाऱ्या वाहनांचा शोध घेण्यात अडथळे निर्माण होतात.
आरटीओच्या अधिकाऱ्यांनी नियमबाह्य आणि फॅन्सी नंबर प्लेट वापरणे अनधिकृत असल्याचे स्पष्ट केले आहे. तपासणीदरम्यान असे प्रकार आढळल्यास संबंधित वाहनचालकांवर नियमानुसार कारवाई केली जाईल. वाहनाचा परवाना रद्द करणे आणि वाहन जप्त करण्यासारख्या कठोर कारवाईचाही इशारा देण्यात आला आहे.
त्यामुळे वाहनचालकांनी नंबर प्लेटवर स्वतःच्या मर्जीने नावे, अतिरिक्त मजकूर किंवा आकर्षक डिझाइन टाकणे टाळावे. शासनाने ठरवून दिलेल्या स्वरूपातील स्पष्ट आणि वाचनीय नंबर प्लेट वापरणे आवश्यक आहे. नियमांचे पालन केल्यास दंडात्मक कारवाई टाळण्यासोबतच वाहतूक व्यवस्थेत वाहनांची अचूक ओळख पटवणेही सोपे होणार आहे.
