लोणी काळभोर : हॉस्पिटलमधील अनियमिततेवर कारवाई न करण्यासाठी तसेच हॉस्पिटलचे रजिस्ट्रेशन रद्द करण्याचा अहवाल वरिष्ठांकडे पाठवू नये, यासाठी तब्बल 20 लाख रुपयांची लाच मागितल्याचा आरोप असलेल्या पुणे महापालिकेच्या वैद्यकीय अधिकाऱ्याला लाचलुचपत प्रतिबंधक विभागाने (एसीबी) 50 हजार रुपयांची लाच स्वीकारताना रंगेहाथ पकडले. ही कारवाई शनिवारी (ता. 26) धानोरी, भैरवनगर येथील संबंधित हॉस्पिटलमध्ये करण्यात आली.
डॉ. ज्ञानेश्वर शिवराम चकोर (वय 50), क्षेत्रीय वैद्यकीय अधिकारी (वर्ग-2), नगर रोड क्षेत्रीय कार्यालय, पुणे महानगरपालिका, असे एसीबीच्या कारवाईत ताब्यात घेण्यात आलेल्या अधिकाऱ्याचे नाव आहे. एसीबीने दिलेल्या माहितीनुसार, संबंधित हॉस्पिटलच्या कामकाजातील अनियमिततेबाबत नगर रोड क्षेत्रीय कार्यालयाकडे तक्रार अर्ज प्राप्त झाला होता. या अर्जाची चौकशी डॉ. चकोर यांच्याकडे होती. 18 सप्टेंबर रोजी ते तक्रारीच्या अनुषंगाने हॉस्पिटलमध्ये पाहणीसाठी गेले होते. त्यावेळी त्रुटींचे निराकरण करावे लागेल, अन्यथा हॉस्पिटलचे रजिस्ट्रेशन रद्द करण्यासाठी वरिष्ठांकडे अहवाल पाठविला जाईल, असे सांगून अहवाल न पाठविण्यासाठी 20 लाख रुपयांची मागणी केल्याचा आरोप आहे.
तक्रारदाराकडून त्यावेळी 30 हजार रुपये स्वीकारण्यात आले, तर उर्वरित रकमेबाबत नंतर सांगतो, असे चकोर यांनी सांगितल्याची माहिती एसीबीने दिली. याबाबत तक्रारदाराने 21 सप्टेंबर रोजी पुणे लाचलुचपत प्रतिबंधक विभागाकडे तक्रार केली. तक्रारीची पडताळणी केल्यानंतर शनिवारी धानोरी, भैरवनगर येथील हॉस्पिटलमध्ये सापळा रचण्यात आला. यावेळी तक्रारदाराच्या केबिनमध्ये 50 हजार रुपयांची लाच स्वीकारताना डॉ. ज्ञानेश्वर चकोर यांना रंगेहाथ पकडण्यात आले.
या प्रकरणी भ्रष्टाचार प्रतिबंधक कायदा 1988 मधील कलम 7 अन्वये विश्रांतवाडी पोलीस ठाण्यात गुन्हा दाखल करण्याची प्रक्रिया सुरू आहे. डॉ. चकोर यांना शनिवारी दुपारी दोन वाजता ताब्यात घेण्यात आले. पुढील तपास लाचलुचपत प्रतिबंधक विभागाकडून सुरू आहे. ही कारवाई पोलीस अधीक्षक शिरीष सरदेशपांडे, अपर पोलीस अधीक्षक अजित पाटील यांच्या मार्गदर्शनाखाली पोलीस उपअधीक्षक निता मिसाळ व सतीश वाळके तसेच एसीबीच्या पथकाने केली.
