नागपूर : नागपूर येथून एक धक्कादायक बातमी समोर आली आहे. प्रेमसंबंधातून विवाहिता चिमूर येथून तिची मुले आणि पतीला सोडून प्रियकरासोबत नागपूरला आली. दरम्यान, दोघांमध्ये झालेल्या वादात प्रियकराने रागाच्या भरात गळा आवळून खून करून मृतदेह एका निर्माणाधीन इमारतीच्या सेप्टिक टँकमध्ये लपवल्याची खळबळजनक घटना घडली आहे. ही घटना मंगळवारी बेलतरोडी पोलिस ठाण्यांतर्गत उघडकीस आली आहे.
अनुराधा (वय-४०, रा. चिमूर) असे खून झालेल्या महिलेचे नाव आहे. नरेश उर्फ नरेंद्र पांडुरंग डाहुले (वय-४०, रा. बेसा-घोगली) असे आरोपी प्रियकराचे नाव आहे. पोलिसांनी आरोपीला अटक करून मृतदेह ताब्यात घेतला आहे.
पोलिसांनी दिलेल्या माहितीनुसार, नरेश आणि अनुराधा एकाच शाळेत शिक्षण घेत होते. दहावी झाल्यानानंतर दोघांचाही संपर्क तुटला होता. ऑगस्ट महिन्यापासून फेसबुकच्या माध्यमातून दोघे पुन्हा संपर्कात आले. अन् दोघांचे प्रेमसंबंध जुळले. नरेश हा चंद्रपूर पोलिस ठाण्यात कार्यरत होता. परंतु, त्याला अवैध कामामुळे जानेवारी महिन्यापासून सेवेतून बडतर्फ करण्यात आले. तेव्हापासून तो घोगलीत राहत होता. अनुराधाचे पती बँकेत वरिष्ठ अधिकारी आहेत.
दरम्यान, 26 नोव्हेंबर रोजी अनुराधा ट्रॅव्हल्स बसने नागपुराला आली आणि नरेशला भेटायला गांधीबाग परिसरात गेली. नरेश तिला कारमध्ये बसवून रेशीमबाग परिसरात घेऊन गेला. भाडणादरम्यान रागात नरेशने अनुराधाच्या ओढणीनेच तिचा गळा आवळून खून केला. त्यानंतर तो कारमध्ये अनुराधाचा मृतदेह घेऊन शहरभर फिरला. अखेर त्याने मृतदेह वेळाहरी गावातील एका निर्माणाधीन इमारतीच्या सेप्टिक टँकमध्ये फेकला. अनुराधाचा मृतदेह कुजल्यानंतर सर्वांना घटनेची माहिती होईल, या भीतीने त्याने कुत्र्याचीही हत्या करून तो मृतदेह सेप्टिक टँकजवळ फेकला.
पोलिसांनी अंदाज वर्तविला आहे की, नरेशने आधीच अनुराधाचा खून करण्याची योजना आखली होती. त्याला संशय होता की, अनुराधा घरून पळून यायला नकार देईल. त्यामुळे त्याने चंद्रपुरातून एक कार चोरी केली. याच कारमध्ये तो अनुराधासह फिरत होता. चंद्रपूरच्या स्थानिक गुन्हे शाखेने कार चोरीचा तपास सुरू केला होता. अखेर पोलिसांना नरेशचा सुगावा लागला.
