गडचिरोली : गडचिरोली जिल्ह्यातील धानोरा तालुक्यात निवासी आश्रमशाळेच्या वसतिगृहात विषारी सापाने दंश केल्याने सहा विद्यार्थिनी बाधित झाल्याची धक्कादायक घटना समोर आली आहे. उपचारादरम्यान तीन विद्यार्थिनींचा मृत्यू झाला असून, अन्य तीन विद्यार्थिनींची प्रकृती चिंताजनक असल्याची माहिती आहे. त्यांच्यावर रुग्णालयात उपचार सुरू आहेत.
ही घटना धानोरा तालुक्यातील जप्तलाई गावातील एका खाजगी अनुदानित निवासी आश्रमशाळेच्या वसतिगृहात घडली. कुंपारलिंगो कल्चरल एज्युकेशनल रिसर्च सोसायटीमार्फत ही निवासी शाळा चालवली जाते. पहाटेच्या सुमारास विद्यार्थिनी वसतिगृहातील खोलीत झोपल्या असताना हा प्रकार घडला.
मिळालेल्या माहितीनुसार, सहा विद्यार्थिनी जमिनीवर झोपल्या होत्या. त्यावेळी एका विषारी सापाने त्यांना दंश केला. अचानक विद्यार्थिनींना त्रास होऊ लागल्याने वसतिगृहात गोंधळ उडाला. घटनेची माहिती मिळताच वसतिगृह प्रशासन आणि स्थानिक नागरिकांनी तातडीने मदतकार्य सुरू केले.
सर्व विद्यार्थिनींना उपचारासाठी रुग्णालयात दाखल करण्यात आले. मात्र, डॉक्टरांनी प्रयत्न करूनही उपचारादरम्यान तीन विद्यार्थिनींचा मृत्यू झाला. उर्वरित तीन विद्यार्थिनींवर वैद्यकीय देखरेखीखाली उपचार सुरू असून त्यांच्या प्रकृतीवर डॉक्टरांकडून लक्ष ठेवले जात आहे.
या घटनेमुळे जप्तलाई गावासह परिसरात शोककळा पसरली आहे. दुर्गम आणि वनक्षेत्रातील आश्रमशाळांच्या वसतिगृहांमध्ये विद्यार्थ्यांच्या सुरक्षेचा प्रश्न पुन्हा ऐरणीवर आला आहे. सापांचा वावर असलेल्या भागात विद्यार्थ्यांसाठी सुरक्षित निवासव्यवस्था, आवश्यक प्रथमोपचार आणि आपत्कालीन वैद्यकीय सुविधा उपलब्ध असणे गरजेचे असल्याची मागणी नागरिक आणि पालकांकडून होत आहे. घटनेनंतर संबंधित यंत्रणांकडून परिस्थितीची पाहणी आणि आवश्यक कार्यवाही केली जात आहे.
