नागपूर : उपमुख्यमंत्री अजित पवार हे मंगळवारी नागपुरातील रेशीम बाग येथे जाणार नाहीत. भारतीय जनता पक्षाच्या वतीने महायुतीतील घटक पक्ष असणाऱ्या शिवसेना व राष्ट्रवादी या पक्षांच्या आमदारांना रेशीमबागेत डॉ. हेडगेवार आणि गोळवलकर गुरुजी यांना अभिवादन करण्यासाठी उपस्थित राहण्याचे निमंत्रण देण्यात आले होते. उपमुख्यमंत्री अजित पवार येथे जाणार नसल्याची माहिती खात्रीलायक सुत्रांनी दिली आहे.
भारतीय जनता पक्षाचे मुख्य प्रतोद आमदार आशिष शेलार यांच्या वतीने आमदारांना उपस्थित राहण्याचे निमंत्रण देण्यात आले होते. परंतु, अजित पवार रेशीम बाग येथे जाणार नाही. मंगळवारी सकाळी भाजपचे सर्व आमदार डॉ. हेडगेवार आणि गोळवलकर गुरुजी यांना अभिवादन करण्यासाठी उपस्थित राहणार आहेत. यामधून उपमुख्यमंत्री अजित पवार यांनी काढता पाय घेतलाय. अजित पवार यांच्या सोबत असणारे इतर आमदार जाणार का? याबाबत मात्र अद्याप कोणतीही माहिती समोर आलेली नाही.
राजकीय वर्तुळात अजित पवार कार्यक्रमाला उपस्थित राहणार का? याकडे सर्वांचे लक्ष होतं. परंतु, पूर्वनियोजित कार्यक्रमांमुळे उपमुख्यमंत्री अजित पवार जाणार नसल्याची विश्वसनीय सूत्रांनी माहिती दिली आहे.
