नागपूर : नागपूर शहरातील मानकापूर (Crime News) पोलीस ठाण्याच्या हद्दीतील गोधणी परिसरात एकतर्फी प्रेमातून घडलेली निर्घृण हत्या संपूर्ण शहराला हादरवून टाकणारी आहे. शेजारी (Nagpur News) राहणाऱ्या विवाहित व्यक्तीने 23 वर्षीय तरुणीचा गळा दाबून खून केला आणि आत्महत्येचा बनाव रचून फरार झाल्याचा (Vidarbh News) धक्कादायक प्रकार उघडकीस आला आहे. या घटनेमुळे परिसरात भीतीचं वातावरण पसरलं असून महिलांच्या सुरक्षेचा प्रश्न पुन्हा एकदा गंभीरपणे समोर आला आहे.
प्राची खापेकर असे या दुर्दैवी तरुणीचे नाव आहे. ती गोधणी येथील कलेक्टर कॉलनीमधील राजलक्ष्मी सोसायटीत कुटुंबासह राहत होती. बी.ए.चे शिक्षण घेत असलेल्या प्राचीने घरच्या आर्थिक मदतीसाठी शेजारी राहणाऱ्या शेखर ढोरे याच्या पत्नीबरोबर शिवणकाम सुरू केले होते. याच ओळखीचा गैरफायदा घेत शेखरने तिच्याशी जवळीक वाढवण्याचा प्रयत्न केला. मात्र त्याचा हेतू लक्षात येताच प्राचीने त्याच्याशी संबंध तोडले आणि अंतर ठेवायला सुरुवात केली.
ही गोष्ट शेखरला सहन न झाल्याने मंगळवारी सकाळी, घरात कोणी नसताना तो थेट प्राचीच्या घरी पोहोचला. दोघांमध्ये वाद झाला आणि हा वाद इतका टोकाला गेला की रागाच्या भरात शेखरने प्राचीचा गळा दाबून तिची हत्या केली. मृत्यू झाल्याची खात्री झाल्यानंतर त्याने ओढणीचा फास बनवून मृतदेह सिलिंग फॅनला लटकवला आणि आत्महत्येचा बनाव रचला.
कुटुंबीय घरी परतल्यानंतर हा प्रकार उघडकीस आला. सुरुवातीला आत्महत्येचा संशय होता, मात्र शवविच्छेदन अहवालात डोक्यावर गंभीर जखमा आणि गळ्यावरील खुणा आढळल्याने खून झाल्याचे स्पष्ट झाले. त्यानंतर पोलिसांनी शेखर ढोरे याला अटक केली असून त्याने गुन्ह्याची कबुली दिली आहे.
